Allannguisut pillugit atuakkiaq nutaaq
Julie Edel Hardenberg allannguisut pillugit atuakkiorsimavoq - atuagaq ateqarpoq Move on
Atuakkap imarai nalaassimasanik sapiiserluni isumannaarinerit katiterlugillu assilialiat pissanganartut. Tassani sammineqarpoq naalliuutinik nakuussutinngortitsisinnaaneq.
Move on-imi atukkaminnik allannguisut sammivai – tassalu inuit peroriartornerminni atugarisaminnik avaanngunartunik allannguisinnaasimasut.
Atornerluinerup sumiginnaanerullu inunnut taakkulu imminnut qanoq isiginerannut qanoq sunniuteqartarnerat atuakkami isertuunniarneqanngilaq, taamalu namminneq pisariaqartitatik tunngavigalugit inuuneqalerniarlutik ilungersoqalutik sivisuumillu sorsuuteqartariaqarsimanerat oqaluttuarineqarpoq. Suliamullu tunngaviusut isumassarsiallu pitsaasuupput inuunermullu kajumissinartuullutik.
Juliep atukkaminnik allannguisimasorpaaluit attavigisimavai inuunermillu oqaluttuassartaasa ilamernginik oqaluttuartillugit. Namminerlu assinik pinnersunik malussarissuseqartumik katiterisimavoq annernaannartumillu ilumoortunik nalunaaruteqartarluni, sammisamut tunngatillugu inuttut nammineq soqutiginninneranut ersiutaasunik. Oqariartuutaali suna tamaat qulaarlugu imminut nittarsaannerunanilu nassuernerunngilaq, akerlianilli pitsaasumik isumaqarluni takutinniarneqarpoq qanga pisimasut isumannaarneqarsinnaasut inuunermilu ingerlaqqittoqarsinnaalluni. Sammisap ammaffigineqalernissaa oqaluuserineqalernissaalu kiisalu atukkaminnik allannguiumaartussanut ikorfartuutaallunilu isumassarsiffiusinnaanera atuakkami anguniakkat ataqqinarnersaraat.
Atuagaq Milik Publishing-miit saqqummersinneqarpoq 250 koruuneqarlunilu.