Kanukokap Kimik akiliisinnaajunnaartutut nalunaarutigaa
Kommunit kattuffiata kommunit arfineq pingasut ajornartorsiortilerpai
Kalaallit Nunaanni kommunit kattuffiata Kanukokap ullumi IT-mik piginneqatigiiffiup Kimik A/S-ip akiliisinnaajunnaartutut Kalaallit Nunaata Eqqartuussivianut nalunaarutigeqquaa.
Østre Landsretip septembarip 1-iani Kimik A/S 1998-imi »suliffeqarfimmik kommunit kattuffianniit tillittutut« Kanukokamut 17,2 millioner koruuniki akiliisussanngorlugu pineqaatissippaa.
Aningaasat septembarip 15-iani akilerneqarsimasussaagaluarput, kisianni tamanna pisimanngilaq. Taamaattumik kattuffiup siulersuisuisa marlunngornermi ualikkut aalajangerpaat, akiliisinnaajunnaarneq Kalaallit Nunaata Eqqartuussivianut nalunaarutigineqassasoq.
Siulersuisut maluginiarpaat Kimik A/S maajip 23-iani ataatsimeersuarnermini aktianik piginnittuutini 1,5 millioner koruuninik akilerniarlugit. Kanukokap akiliisinnaajunnaartutut nalunaarutiginneqqusissummigut piginneqatigiiffiup aktiaatiliutaasa suliffeqarfiup pisuussutaanik nalilinnik tigooraalernissaat pinngitsoortitsiniarpaa.
Akiliisinnaajunnaarnermik piumasaqarnermigut kattuffiup kommunit ilaasortarisani arfineq-pingasut ajornartorsiortilerpai. Kommunit IT-imik ingerlatsivik Winformatik pigaat, taannalu Kimik A/S-imit isumagineqarlunilu ineriartortitaavoq.
Kattuffiup siulittaasuata Søren Alaufesenip kommunit taakku arfineq-pingasut Kimik-p atorunnaarsinneqarsinnaanera pillugu piareersaqqullugit siusinnerusukkut kaammattuutigisimavaa.
Søren Alaufesen kattuffiup Ilulissani ataatsimeersuarnerani nalunaarumminni oqaatigaa, Østre Landsretip oqaatinik soorlu »pisussaatitaanngilluinnarluni» atorlugit Kimik-iup Kanukokamut iliuuserisimasaata isumaqatigiissuteqarnissamut periarfissiisimanngitsoq.