Sisimiuniit ilaasut Airbus inortorpaat
Air Greenlandip Air Bus 330-200, kuullimi angallanneq peqqutigalugu Kangerlussuup Københavnillu akornanni sapaammi immikkut ittumik ingerlaatitaq kangerlussuarmiit aallartariaqarsimavoq, angalasut Sisimiuneersut tikinnissaminnut kinguaattorsimasut utaqqeqqaarnagit.
Taamak Air Greenland ilisimatitsivoq.
Sisimiuniit ilaasut Dash-7-i ilaaffissaat teknikkikkut ajoquteqarneq peqqutigalugu kinguaattoorsimapput. Kangerlussuarmi sila nuissat pukkitsut peqqsutigalugit isikkivilussiartulersimavoq, peqatigitillugulu Mittarfeqarfiit atortuisa ilaat localizerimik taaneqartartoq timmisartut minnissaanni qangattarnissaannilu atorneqartartoq atorsinnaasimanani.
Taamaammat Air Greenlandip timmisartuussisarnermut ingerlatsiviata aalajangerpaa, Kangerlussuarmi ingerlaqqissinnaajunnaarnissaq pinngitsoortinniarlugu atlantikoq qulaallugu timmisartuussinissaq piffissaq eqqorlugu aallassasoq, taamaaliunngippat ullumikkut Danmarkiliartussanut ataasinngorpallu Kalaallit Nunaaliartussanut akornutaalersussaammat.
Air Busi minuttialunnik kinguaattoorpoq, taamalu Sisimiuniit ilaasut Kangerlussuarmut apuukkamik timmisartorsuaq aallartarfimmukartoq takusinnaasimavaat. Kisianni timmisartorsuup ilaasut taakku pisataallu utaqqissasuuppagit minuttit suli 30-45-it utaqqisariaqarsimassagaluarpoq, taamalu sila suli ajorseriaqqissinnaalluni, taamaattumik utaqqinnginnissaq aalajangiusimaneqarpoq. Sisimiuniit ilaasut ilaat ataasiakkaat maanna ataasinngornermi timmisartumut ulikkaarutinut siullernut nuutinneqassapput, sinnerilu marlunngornermut.