Moses Olsen ilisaavoq

Palasi politikerilu Jonathan Motzfeldt ukiuni 54-ini ikinngutigilluarsimasami ilisaanerani oqaluussisuuvoq.

Namminersornerullutik Oqartussat pilersitsisuisa ilaat, partiimik Siumut-mik pilersitseqataasut ilaat, naalakkersuisunut, inatsisartunut folketingimullu ilaasortaasimasoq, taalliortoq innuttaasunullu oqallissaarisartoq Moses Olsen, ullumikkut sialussuup ataani anorlersukasiugaa Nuummi ilisaammat kingullerlerpaamik inuulluaqquniarlugu inuppassuit silarluup ataani ingiaqataapput. Oqaluffik naasorpassuarnik nigalilianillu ulikkaarpoq, amerlaqisullu kalaallisoorlutik annoraasisarlutillu naalagiarput.

Jonathan Motzfledtip oqaluussinini Matthæusip evangiiliuanit issuaalluni aallartippaa, taannalu namminersornerullutik oqartussat eqqunneqarmat Jonathan Motzfeldtilu naalakkersuisunut siullersaalluni siulittaasunngoqqaarmat Moses Olsenip issuaaffigisimasaraa:

– "“lisimavusi inuiaqatigiit siulersortaasa naalagaaffiginiartaraat, annertaasalu naalakkersortaraat. Ilissinnili taamaassanngilaq; kisianni ilissinni angisuunngorumasup kiffartuullisi, ilissinnilu siulliujumasoq ilaminut kiffaannaagili.” Mat. 20, 25-27.

Jonathan Motzfeldtip Moses Olsen 16-inik ukioqartorli ilisarisimalersimagaa Mosesimut tunngasumik oqalugiarpoq, ilaatigut oqarluni:

– Uanga iluanaarluartutut misigisimavunga. 16-inik ukioqarlungali inuunera tamaat ikinngut ilumoortoq ingiaqatigisimavara, suleqatigisaq pitsaasoq. Toqussaa tikillugu ingiaqatigiissimavugut.

– Moses eqqarsarnertuujuvoq, eqqarsaatinilu taallanngortikkaangamigit avatangiisai tamarmik uummartarput.

– Inuup inuunera Guutimit tunissutaavoq. Mosesillu kiffartuussisutut inuunera maanna naavoq. Takoreerparput kalaallit inuiaat asallugit kiffartuukkai. Moses Olsen allanit annerujumasarsimanngilaq ilaatigullu maniguuttuulluni. Uagut suli inuusugut anersaava ilangiuassavarput, taannalu sapinngisatsinnik allanut siaruarniarumaarparput.

– Ikinnguterput, kiffarput Kalaallit Nunaannut ernerulluartut ilaat Moses Olsen, inuulluarit.

Powered by Labrador CMS