Qitequt eqqaamajuk

Nutaamik malittarisassiornermi nunatsinni angallanneq isumannaallisarniarneqarpoq pitsanngorsarniarneqarlunilu.

Biilimi, bussimi taxanilu issimasut tamarmik, aquttuugunik imaluunniit ilaasuugunik, qitequteqartalernissaat angallannermi inatsimmi allannguutissat pingaarnersaasa ilagaat. Biilip issiavii tamarmik qitequsersorneqartariaqassapput malittarisassaq malinneqassappat - aquttup tunuani issiaviit aamma ilanngunneqassapput, kiisalu:

– Aalakoornartumik imigassartorsimasup aavani promille minnerpaaffimminiittoq suli minnerulersinneqarpoq; 0,5 promille-mut ilineqarami. Biilinik aqussagaanni imigassartornaveersaarnissaq pineqartariaqalissaaq.

– Biilit motorillit tamarmik qullilersortariaqassapput aquttoq qanimut takunnissinnaalersillugu.

– Biilimi aquttoq aqutsilluni oqarasuaammik angallattakkamik tigummilluni oqaluusseqqusaajunnaarpoq.

– Qamuteralammik, motorcykelimik knallertimilluunniit aquttuussagaanni akuerisamik pinngitsoorani niaqorornaveeqquseqqaartariaqarpoq. Qamuteralammik imaluunniit motorcykelimik ilaasuuniaraanni aamma tamanna atuuppoq.

– Angallannermut inatsimmi qamuteralammik aquttup ukiui 18-inut killilerneqarput. 16-inik imaluunniit 17-inik ukioqarluni qamuteralaat atorlugit piniarniaraanni imaluunniit nunalerinermik suliaqarniaraanni immikkut akuersissummik politiinut qinnuteqarnikkut ukiut apeqqutaatinnagit akuersissummik tunniussisoqarsinnaavoq.

– Meeqqat pingasut inorlugit ukiullit isumannaallisaanermi atortut akuerisaasut atorlugit qitequserneqartassapput: meeqqat issiavii biilini atorneqartartut (autostol, boxette imaluunniit liftnet) atorneqartassapput.

– Meeqqat pingasut sinnerlugit ukiullit biilip nalinginnaasumik qitequtaannik qitequserneqarsinnaapput, taamaattorli meeqqat issiavii biilini atorneqartartunut qitequserneqartarnissaat pitsaanerpaassaaq. Meeqqat pingasut sinnerlugit ukiullit sulili arfineq-marlunnik ukioqalersimanngitsut akisaasamik issiavilerlutik qitequteqarsinnaatitaapput.

– Qitequt meeqqap taliata ataanut aalajangersarneqaqqusaanngilaq. Tamanna inuunermik navianartorsiortitsisinnaavoq. Qitequt eqqortumik atorneqassaaq: tuiup nalaaniit saaq aqqusaarlugu tuip akiata nalaaniittumut qitequtip ikkuffissaanut ikkunneqartassaaq.

– Meeqqat marluk qiteqummik ataatsimik qitequserneqassanngivipput. Tamanna inerteqqutaavoq inuunermillu navianartorsiortitsisinnaalluni. Ajunaartoqarnerani meeqqat imminnut nanertornerannik tamanna kinguneqarsinnaavoq.

– Meeqqat 15-it inorlugit ukiullit biilimiitsillutik eqqortumik qitequsertarnissaat aquttup akisussaaffigaa.

– Meeqqat pingasut inorlugit ukiullit taxi-ni bussinilu meeqqat issiavii biilini atorneqartartut atortariaqanngilaat imaluunniit qitequteqartariaqanngillat. Taamaattorli taxa-mi imaluunniit bussimi meeqqat issiavii biilini atorneqartartut pigineqarpata taakku pinngitsooratik atorneqassapput.

– Meeqqat issiavii biilini atorneqartartut Europami parlamentip tunngaviusumik malittarisassai ECE 44-03 imaluunniit ECE 44-04 naapertorlugit akuerineqartussapput. Issiavik meerarlu imminnut naleqquttussaapput - angissutsimikkut oqimaassutsimikkullu. Issiavik biilimut ikkussuutilerukku qanoq ikkussuunnissaanik ilitsersuut atuassallugu eqqaamassavat.

Angallannermi malittarisassat nutaat politiit nittartagaanni uani: http://www.politi.dk/Groenland itinerusumik atuarsinnaavatit.