Kalaallip atuakkiaa tallimanik ulloriannappoq

Julie Edel Hardenbergip atuakkiaa "Move on" qallunaat aviisianni nersualaarneqarpoq.

Julie Edel Hardenberg kalaaliuvoq assilialianik eqqumiitsuliortartoq maluginiarneqartariaqartoq, Berlingske Tidende atuakkamik "Move on", inuunerminnik allanngortitsisunik oqaluttuartumik, naliliinermini allappoq.

– "Move on" oqaluttuaavoq meeqqanik sumiginnarneqarsimasunik, meeqqanik takunnittunik nammineq pinnatik angajoqqaaminnik imigassamik toqqaasunik, atuarlugulu annernarpoq. Tamannali peqatigalugu aamma oqaluttuaapput oqaluttuartunik taamatut peroriartoraluarluni ingerlaqqittoqarsinnaaneranik aviisi allappoq.

Atuakkami Juliep inuunerminnik allanngortitsisut arlallit attaveqarfigai, namminerminnullu oqaluttuassat ilaannik oqaluttuartillugit. Nammineq kusanartunik misigissuseqarnartunillu assilinik katitikkanik ilanngussivoq peqqusersuitsumillu saqqummersitsineragut malunnarpoq nammineq aamma tamanna misigisimallugu.

Imaanngilarli imminut tunniussisoq nassuertitsisorlu, akerlianilli ajunngitsumik takutitsilluni ilisimatitsilerlunilu, qanga pisut qaangerneqarsinnaasut inuunermillu ingerlatseqqilluni. Sammisaminik ammanermik oqallinnermillu pilersitsiniarluni kiisalu inuunerminnik allanngortitserusussinnaasut allat atuakkiamigut pitsaanerpaamik tapersersorlugit.

Powered by Labrador CMS