Unnuk kulturisiornermi ikinnerusunit Kalaallit Illuutaat ornigarpaat
Ukioq manna Unnuk Kulturisornermi 1.600-ngajaat Kalaallit Iluutaat Københavnimiittoq ornigarpaat. Siornamut sanilliugu 400-nik ikinnerusut
Isaasut ikinnerugaluartut taamaattoq Løvstrædemi sammisassaqartitsisoqarluarpoq:
Akunnerit pingajuat avillugu qaangiutiinnartut tuttumik qaqorteeqqasuliat nungunneqarput. Najannguaq L. Sværdip atisanik takutitsinerani issiavissaaruppoq, Ulf Fleischerillu tusarnaartitsinera naammassereeraluartoq erinarsoqqinnissaanik noqqaapput.
Qivioq Kern Kreutzmannip nunami allami inuusuttuuneq pillugu filmiliai pingasut aamma takutinneqarput.
Erinarsoqatigiit Aavaat ulapeqaat. Løvstrædemi Christiansborgimilu erinarsoqatigiit qilaatersorlutillu erinarsorput, Atlantikup Avannaani Suleqatigiit Christiansborgimi Nunatsinni Savalimmiunilu pissutsit pilugit aamma paasissutissiipput. Christiansborgimi pisut Grønlandsværelsemi ingerlanneqarput.
Nunanik Avannarlernik soqutiginnittut aamma periarfissinneqarput Isak Kleistip filmiliaa "Ved de frosne floder" Christiansborgimi takussallugu.
Unnuk naaneqarpoq Ilulissanut uterlugulu billetsimik makitsinermik, taanna Kalaallit Nunaanni Takornariartitsinermik- aamma Inuussutissarsiornermik Siunnersuisoqatigiinnit aningaasalerneqarpoq. Tassanngalu eqquisuuvoq københavnimiu.