Peqqinnissaqarfik peqqissaasuerutilerpoq
Naalakkersuisut ajornartorsiutit takunngitsuusaaginnarniarpatigit siunissami peqqinnnissaqarfik aalajangersimasunik atorfilinnik peqqissaasuerutissaaq. Tamanna peqqissaasut siulittaasuata Karin Hollerip siulittuutigaa.
Peqqissaasut Kattuffiannit PKmit oqariartuut Nuummi sisamanngormat unnukkut ataatsimeersuareernerup kingorna saqqummiunneqarpoq.
Tassuunakkut Karin Hollerip peqqinnissaqarfimmi peqqissaasutut atorfiit pilerinartuussappata naalakkersuisut tungaanniit iliuuseqartoqarnissaa ujartorpaa. Nunarsuaq tamakkerlugu peqqissaasut amigaatigineqarput, taamaattumik Kalaallit Nunaata sulisussarsiornermi sulisullu tigummiinnarniarunigit namminersornerullutik oqartussat assersuutigalugu akissarsiatigut unammillersinnaasariaqarpoq.
- Tassuunakkut unammillersinnaassuseqanngilagut. Akissarsiat ajorneruppata, inigisat pitsaasuunngippata aammalu meeqqeriviit atuarfiillu iluamik ingerlanngippata maanngarnissaq pilerinanngilaq. Niuernikkut nukiit matumani atuupput - aamma Kalaallit Nunaanni - imaappoq peqassuseq perusussuserlu peqqissaasut nalingisa akiinut aaliangiisuupput, Karin Holler siulittaasup nalunaarutaani taamak oqarpoq.
Taamaattumik spirali killormut ingerlasoq ingerlavoq, tassa peqqinnissaqarfiup suliassat aaqqinniarlugit peqqissaasut vikarissarsiorfikkoortut akisuut akilersoramigit, taamalu illuatungaani peqqissaasunut aalajangersimasumik atorfilinnut pilerinarunnaariartuinnartoq.
Dronning Ingridip Napparsimmavissuani aningaasaqarnikkut missingersuusianik annertuumik qaangiisimaneq peqqutigalugu oktobarilli qaammataani peqqissaasunik taartaasartunik atuineq annerpaatigut unitsissimavaa. Unitsitsineq ukiup sinneranut atuuppoq, tamatumalu kingunerisaanik immikkoortortaqarfiit arlallit matusariaqarnerannik napparsimasut torsuusarsuarni inissittariaqartarsimapput, peqqissaasullu aalajangersimasumik atorfillit malunnartumik sulinerulersimallutik. Tamatuma kingorna Ilaqutariinnermut Peqqissutsimullu Naalakkersuisoqarfiup immikkut ittumik 7 millioner koruuninik tapiissuteqarnissaq qinnuteqaatigaa, ajornartorsiutit aaqqiiviginiarlugit.
PKp siulittaasuata nalunaarummini tassunga atatillugu erseqqissarpaa, immikkut ittumik aningaasaliissutit piffissaq sivisunerusoq eqqarsaatigalugu aaqqissutaanavianngitsut.
- Kalaallit Nunaanni peqqissaasunik amigaatigeqisatsinnik sulisoqalissappat aaqqissuutissat piffissamut sivisunerusumut atuuttussat nassaariniartariaqarput. Naalakkersuisut pissutsinut ilungersunartunut akisussaaqataapput. Misigisimavunga naalakkersuisut tusaanngitsuusaartut atorfilittamik sulisullu qulliunerusut namminneerlutik aaqqinniassagaat utaqqisutut illugu. Akisussaaffimmik qimarratiginninnermut qanippoq, Karin Holler nalunaarummini oqarpoq.
Tassunga atatillugu Karinip naalakkersuisut kajumissaarpai, aningaasat taartaasussarsiortarfinni namminersortuni peqqissuusunik taartaasartunut akisuunut atornagit peqqissaasut aalajangersimasumik atorfillit akissarsiaasa malunnartumik qaffannissaannut atortariaqaraat.