Kalaallit ilusilersugaat USA-mi tunisaalluarput

Isaksen Design NewYorkimi pisiniarfissuarmi Takashimaya-mi annertunerpaamik tunisaqartartut ilagaat, taamatut allappoq Jyllands-Posten.

Pisiniarfissup 5th Aveneue-miittoq ukiumi kingullermi kalaallit atisanik ilusilersuisarfiannit tallimariarluni inniminniisarsimavoq:

– Maanna Takashimaya-mi tunisaqarnerpaat akornanniilersimavugut. Pitsaanerusumik nersualaartiffissaqanngingajappoq. Neriuutigaarpullu pisiniarfissuup Japanimi immikkoortoqarfiani tuniniaasalersinnaalluta, Jyllands-Posten naapertorlugu Nickie Isaksen isumaqarpoq.

Tamatuma saniatigut Takashimaya-mik suleqatigiinnerup kingunerisaanik pisiniarfissuup Isaksen Design kajumissaarsimavaa Hillary Clinton kavassiuuteqqullugu, præsidentitullu qinigassanngortissimasoq kingorna taanna atorlugu assilisippoq.

Pisiniarfissuup saniatigut Isaksen Design USA-mi Canadamilu pisisartoqangaatsiarpoq, aammalu Kalaallit Nunaanni, Islandimi, Sverigemi, Norgemi Hollandimilu kiisalu Danmarkimi pisiniarfinnut atisanik tunisisarluni.

Atisaliani tamani qalipaatit aappalaartoq, qaqortoq qernertorlu atorneqartarput, kalaallisuuni aamma atorneqartartut Qaqortoq takussutissaavoq siulit saarnginut, qernertoq anersaat silarsuaata qalipaatigaa, aappalaartorlu inuunerup aavanut takussutissaalluni.

Nickie Isaksenip nammineq siunissamut sinnattugaraa nammineq arnimilu ingerlatsiviat suli anginerulissasoq atisanillu mutinik nunarsuarmi annertunerusumik tuniniaasalerluni. Piffissarli ungasinnerusoq eqqarsaatigalugu immaqa Kalaallit Nunaat aallaavigeqqilersinnaavaa:

– Piffissap ingerlanerani angerlarusuppunga nassaarniallaqqissunullu periarfissanik pitsaanerusunik pilersitseqataarusullunga. Siunissap takutikkumaarpaa tamanna pisinnaanersoq. Sinnattorli atavoq, Nickie Isaksen oqaluttuarpoq.

Powered by Labrador CMS