Qanga inuit taqqamikkut milittoorneq ajorput

Kalaallit Nunaanni nakorsat arlallit misissuinermi paasisat saqqummiuppaat, tassaniu takuneqarsinnaavoq Kalaallit Nunaanni inuit akornanni uummatikkut taqqamik milittoortarnerit qanoq qaqutigoorsimatigisut.

Paasisat atuagassiami "Atherosclerosis" allaaserineqarput nakorsanit Marie Kjærgaardimit, Stig Andersenimit, Mads Holtenimit, Gert Mulvadimit aamma Jens Jørgen Kjærgaardimit, Nuummi Dronning Ingridip Napparsimmavissuani nakorsaatinut immikkoortoqarfimmeersut nakorsiartarfimmeersullu.

Nakorsat inunnit 1800-t missaanniittunit, ukiut 45-t matuma siornatigut Ammassalimmi najugaqartunit, kardiogrammit (uummatip tillernerata nalunaarsorneri) misissorsimavaat. Paasisat takutippaat ischæmi-mik, uummammi iltimik amigaateqarnermik, takussutissaqarpallaanngitsoq, aammalu hypertrofi, tassa uummammi nukik sakkortooq, atugaangaatsiartoq.

Allaaserisaq pingaaruteqarpoq, pissutigalugu nakorsat isumaqarmata ukiuni kingullerni amerlanerusut uummatikkut nappaateqartalersimasut taqqamik qerattartoornerit taassumalu kinguneranik nappaatit kingunerisaannik. Nakorsalli manna tikillugu kisitsisinik takussutissaqarsimanngillat tamassuminnga uppernarsaasunik. Taamaattumik kardiogrammit misissornerat pingaaruteqarpoq.

– Tassuunakkummi uppernarsarneqarpoq nappaatit taqqamik qerattartoornermut attuumassuteqartut 1963-ip missaani ullumikkuminngarnit Tunumi kalaallit akornanni qaqutigoornerujussuusut, paasisat pillugit tusagassiorfinnut nalunaarummi Jens Jørgen Kjærgaard oqarpoq. Taanna ukioq manna tikillugu ukiuni arlalissuarni DIH-mi nakorsaatinut immikkoortoqarfimmi nakorsaanerusimavoq.

Ilanngullugu misissuinermi paasisat naapertuupput ukiut 45-t matuma siornatigut Kalaallit Nunaanni inooriaatsip sulinarnerujussuusimaneranut. Taamaattumik pualavallaarneq, sukkorneq, nappaatit taqqamik qerattartoornerup kinguneqaatai aallu qaffasippallaarnera inuit ikinnerujussuit atugarisimavaat.

– Nappaatit tamakkua Kalaallit Nunaanni innuttaasut akornanni atugaanerujussuanngorsimapput, taamaattumik tamanna pakkersimaarniarlugu suliniuteqarnissaq pisariaqarpoq, Gert Mulvad, Nuummi Nakorsiartarfimmeersoq, oqarpoq.

Powered by Labrador CMS