Asilerisoq: Tulugaq-mik paasisitsiniaaneq nutaaq
Containerini umiarsualivinnilu puisit ilivitsut toqungasut takutippaat Namminersornerullutik Oqartussat nungusaataanngitsumik paasisitsiniaanerat puigorsimagipput, asilerisoq oqarpoq.
Ittoqqortoormiini qilalukkanik qernertanik toquinnakkanik qimaannakkanillu pisimasoq kisiartaanngilluinnarpoq. Akuttunngitsumik puisinik aamma taamaasiortoqartarpoq, Qaqortumi asilerisoq Christian Isaksen Sermitsiaq.gl-imut oqarpoq.
Taanna oqarpoq piniartut amerlaqisut, pingaartumik Qeqqani Kujataanilu, puisinik aallaannittartut amia pissutigiinnavillugu. Puisit ilivitsut timaat containerinut umiarsualivinnullu igiinnarneqartarput.
– Nammineq isinnik takusimavara Qeqqani Kujataanilu piniartut qanoq isillutik puisinik 50-it angullugit amerlatigisunik pisaqartartut. Puisilli timaa ataasiinnaq nerisassatut angerlaattarpaat, Christian Isaksen, sinerissami angalasimasoq, oqarpoq. Taanna fiskeriteknologitut ilinniarsimavoq Arctic Greenfoodimilu kiisalu Pinngortitaleriffimmi sulisimalluni.
– KIsiannili puisit nungutaanissaanik ulorianartorsiortoqanngilaq. Taamaattumik ilumut taamak ajortigigami?
– Ajoqaaq. Piniartuunermik tulluusimaarutiginninneq peerussimavoq aningaasanillu pissarsiniarnerput pissutigalugu pitsaanngitsumik isigineqalersimavugut, Christian Isaksen oqarpoq.
Taanna isumaqarpoq aaqqiissutissaq tassaasariaqartoq nungusaataanngitsumik paasisitsiniaanerup aallarteqqinneqarnissaa, tassunakkullu aamma ilinniassavarput miluumasut imarmiut qanoq pisaanerusumik atorluarsinnaanerivut.
– Tulugaq aallarteqqinneqassaaq. Puigorneqareersimavoq. Aammalu nunanut allanut sammitinneqartariaqarpoq kulturerput oqaluttuaralugu, Christian Isaksen oqarpoq.