Annaassiniarnermut takunittut
Karlap aamma Per Nielsenillu Nuummeersut inuit kuliltemik ajunaangajattut qanimut isigaat.
Sapaatiummat angallammik angalaarneq Karlamut Per Nielsenimullu ilimagisaminnit allaanerulluinnartumik ingerlavoq.
Nuummiit kilometerit arlalalunnguaannaat ungasitsigalutik Aasiaat Radioaniit angallammi imminnut ungasinngitsumiittumi annertuumik ajornartorsiortoqartoq pillugu kalerrisaarut tusaavaat. Nangaajallagatik angallat ajutoorfiusoq ornissimavaat.
- Paatsiveerusimaarnarpoq, tassa angallatip sumiiffippiaa paasinnginnatsigu. Kisianni angallat Aqissersiorfiiup eqqaaniittoq nassaaraarput, Nuummit kujammut 5 kilometerit kissaannik ungasissusilimmi, Karla Nielsen nassuiaavoq.
- Uagut angallaterput sukkavallaanngilaq, taamaammat suli apuutinngitsugut angallammit allamit ajutoortunut apuuteqaartumit qaangerneqarpugut. Angallammit tassanngaaneersut ilaat ajutoortumut ikeriarluni aquutaa tigoriarlugu inuit ajutoortut tallimat taakku Nuummukaappai. Ajutoortut umiatsiaq sungaartoq kalitaraat, taanna uagut kalusiupparput, taamaanngippat kinguarsaatigissammassuk, Karla Nielsen oqaluttuarpoq.
Per aamma Karla Nielsenikkut angallamminnik ikiueqqaarnissamut poortukkamik peqarsimapput. Ikiueqqaarnissamut iliniarsimanngikkaluarlutik pisut najummassimanartuusut takusinnaavaat.
- Ajutoortut ilaasa timaat tamarmik sajuttuinnaapput. Angallatip piaarnerpaarpaamik Nuummukaannissaa pitsaanerpaasoq qularutissaanngilaq, Karla Nielsen nassuiaavoq.