Sisimiuni imeq immaqa bakteriaqanngilaq

Sisimiuni imeq ippassaq misissornerani bakteriaqartoq paasineqartoq, imermit tamakkiisumik minguiaavikkoortinneqarsimanngitsumit tiguneqarsimavoq.

Ataasinngormat Namminersornerullutik Oqartussat Nakkutilliinermut Immikkoortortaqarfiata Sisimiuni innuttaasut inappai imeq qalaattaqqullugu. Nukissiorfiit misissuinerisa maanna takutippaat imeq misissorneqarsimasoq tiguneqarsimasoq imermit nutaamik ikkussukkami UV-filterikkoortinneqarsimanngitsumeersumit. UV-filterikkoortitsinikkut bakterissat piiarneqartarput, taamatut allappoq Nukissiorfiit quppernermi nittartakkamini.

Selskabip nalunaarutigaa imermik misissugassamik UV-filterikkoortinneqarsimasumik maanna tigusisoqassasoq. Taanna misissorneqareerpat Namminersornerullutik Oqartussat Nakkutilliinermut Immikkoortoqarfianit nalunaarutigineqarumaarpoq erngup qalaanneqarnissaanik inassuteqaat atorunnaarsinneqassanersoq attatiinnarneqassanersorluunniit.

Powered by Labrador CMS