Nukappiaraq sapiitsuliortoq akissarsisinneqartoq
Aannguaq Isobethsen Upernavimmiu sapiitsuliorsimasutut Carnegiep aningaasaateqarfianit checkimik 1.000 kr.-inik aningaasartalimmik akissarsisinneqarpoq
Aannguaq Isobethsenip 2007-imi juulip 24-iani nukappiaraq ipinissaraluanit annaappaa, namminerlu annaassiniarnermini ulorianartorsiorsimalluni.
Aannguaq Isobethsenip nukaa Aannguullu ikinngutiginerpaasaa qulimiguullit mittarfiata eqqaani pinnguartillutik imaanut nakkarput. Aannguup qatanngunni atugarlioqisoq siulliullugu qaqippaa ikiortissarsioqqullugulu. Taava ikinngunni suli immap iluaniittoq annaanniarlugu aallartippaa.
Ikiuiartortut apuummata nukappiaqqat marluullutik aalajunnaarsimasut imaaniipput, kisianni piffissat kingullerpaaq atorlugu uummarsarneqarlutik uummartinneqarput. Nukappiaqqat tamarmik ullumikkut ajutoornermit kingunerlutsitsisimanngillat.
Upernavimmi politeeqarfimmi pisortap Finn Larsenip checki aningaasaateqarfik sinnerlugu tunniuppaa, tunniussinermullu atatillugu oqaatigaa, uani sapiitsuliorneq annertooq pisimasoq, naak Aannguaq Isobethsen nammineq nukappiarannguugaluarluni.
Aannguaq Isobethsenip checki septembarip 9-ani tiguaa.