2008-mi ikiueqqaallammattut toqqarneqartoq
Upernavimmeersoq Aannguaq Isbosethsenip nukkani allalu nukkapiaraq ipinissaraluannik annaakkamigit maanna pingajussaanik akissarsisinneqarpoq. Annaassiniarnermini nammineq ipingajavippoq.
Kalaallit Røde Korsiata sapaatit akunneranni kingullermi 14-inik ukiulik Aannguaq Isbosethsen ukioq manna ikiueqqaallammattut toqqarpaa. Nersorneqarnera 10.000 koruuninik aningaasartaqarpoq.
Aannguaq Isobethsen 2007-mi 24. juli nukappiaqqat marluk ipinissaraluannik annaappai, annaassiniarnerminilu nammineq ipingajavilluni.
Nukaa Nukannguaq aamma Aannguup ikinngutiginerpaasaa Ilannguaq heliportimi pinnguartillutik imaanut nakkarsimapput. Siullermik qatanngutini Aannguup qaqippaa ikiortissarsioriartoqqullugulu. Tamatuma kingorna ikinngutini nuisanani immamiittoq annaannialerpaa.
Ikiuisussat tikiummata nukappiaqqat uumarsigatik immamiittut siumorpaat, piffissaagallartilluguli uummarsarneqaramik uummarput.
Aannguaq Carnegie-fondenimit marloriarluni aamma akissarsisinneqareerpoq, aappassaanik Carnegie-qunusuitsutut. Katillugu 16.000 koruuninik tunissuteqarfigineqarpoq.