Takornariarneq pillug qanimut suleqatigiinneq
Kalaallit Nunaannut takornariarnissamik soqutiginninneq suli annertusiartorpoq. Tamanna Vestnorden Travel Martimi paasinarsivoq.
Kalaallit Nunaat, Island aamma Savalimmiut takornariaqarnermut tunngatillugu imminnut qaninnerulerput. Tamanna angalasarnermut tunngatillugu nittarsaassinermi Vestnorden Travel Martimi islandip illoqarfiisa pingaarnersaanni Reykjavikimi sapaatip akunnerani uani ingerlanneqartumi paasinarsimavoq.
Nunani taakkunani pingasuni takornariaqarnermik ingerlataqartuusut nassuerutigaat nunarsuarmioqatigiinni unammilleqatigiinnermi kisimiinneq imminut akilersinnaanngitsoq. Taamaattumik nittarsaassinerit ataatsimut ilisarnaaserlugit oqariartuuserlugillu qaninnerusumik suleqatigiissutiginiarpaat, tassa Atlantikorsuup Avannaani pinngortitaq minguitsoq akornuserneqarsimanngitsorlu misigisassaasoq.
Taamaakkaluartoq ataatsimoortumik nittarsaassinerup tamatuma nunat ataasiakkaat imminnut tuniniarsinnaanerannut mattussinngilaq. Nunani Avannarlerni Killerni ataatsimut soqutigisat amerlagaluartut nunat taakku pingasut takornarissanut neqeroorutigisinnaasaat assigiinngitsorujussuupput.
Kalaallit Nunaanni Takornariaqarnermut Inuussutissarsiornermullu Siunnersuisoqatigiinni pisortap Thomas Rosenkrandsip ukioq manna Travel Marts naammagisimaarpaa.
- Suleqatigisatsinnik oqaloqatiginninnerit pissarsiaqaatigeqaagut, ataqatigiisitsiluni takornariartarneq soqutigineqaleriartuinnartoq paasinarsimmat. Takornariat amerlasuut angalanermi ataatsimi nunani avannarlerni killerni nunat arlallit tikikkusuttarpaat, tamannalu umiarsuarmeeraanni timmisartumeeraanniluunniit periarfissaavoq annertusiartuinnartoq, GTE-mi pisortaq oqarpoq.
Vestnorden Travel Mart kalaallit nunaata aappaagu aaqqissuutissavaa. Nittarsaassineq Københavnimi 2009-mi septembarip 16-iani 17-ianilu ingerlanneqassaaq, kalaallit aaqqissuussisut taamak ilisimatitsipput.