Nunatsinnit qimarranneq ingerlaannarpoq
Kalaallit Nunaanni Naatsorsueqqissaartarfimmit kisitsisit nutaat uppernarsarpaat Kalaallit Nunaannit qimarranneq annertoorujussuarmik ingerlaannartoq, nunanullu allanut nunasiartorneq maanna inuiaqatigiit ajornartorsiutaasa annerpaat ilagilersimavaat.
2007-imi inuit 500 aamma 600 akornanniittut Danmarkimut siumuinnaq billetsisipput Kalaallit Nunaallu qimallugu. Tamanna takuneqarsinnaavoq Kalaallit Nunaanni Naatsorsueqqissaartarfimmit kisitsisini nutaarluinnarni, suli tamanut saqqummiunneqanngitsuni.
Kisitsisit uppernarsarneqarput Kalaallit Nunaanni Naatsorsueqqissaartarfimmi immikkut siunnersortimit Keun Hwangimit, taassumalu suliassaqarfiisa ilagaat nunatsinni innuttaasut angalanerat. Kisitsisillu eqqortut suli piginngikkaluarlugit ukiuni kingullerni periuseq uppernarsarpaa.
- 2006-imi inuit nunanut allanut nunasiartortut 644-uupput, 2007-imilu ikinnerulaartussaagunaraluartut inuit nunamit aallarartut suli amerlasoorujussuupput, Keun Hwang oqarpoq.
2006-imi nunanut allanut nunasiartortut ukiuni 15-ini aatsaat taamak amerlatigisimapput, tassalu nunanut allanut nunasiartornerujussuaq ingerlaannarpoq. Ilimanarporlu ukiuni aggersuni amerliartussasut.
Sermitsiaq Inuussutit atuaruk.