Akerliussutsimik takutitsinissamut kajumissaarivoq

Peqatigiiffik 16. augustip Nuummi innuttaasut kajumissaarpai akerliussutsimik takutitsinissami peqataaqqullugit aammalu atsiornernik katersat nunami politikerinut tunniunneqarnerat malinnaaffigeqqullugu.

Akerliussutsimik takutitsineq pissaaq marlunngornermi septemberip 23-ianni nal. 12.15, Brugsen Nuuk-p Legelandillu akornanni Aatsitassanut Pisortaqarfimmit, rådhusi saneqqullugu inatsisartut ataatsimiittarfiata saavanut ingerlaaqatigiilluni.

2007-imi augustimi Kalaallit Nunaanni ujaqqanik pinnersaasiassanik katersisut tallimat pinngitsaalineqarput tammaarsimaffitsik poortussagaat aatsitassanullu pisortaqarfimmit politiinillu peersinneqarlutik, Kalaallit Nunaanni ujaqqanik sunilluunniit katerseqqusaanatik niueqqusaanatillu.

Tamatuma kingorna taakkua atsiornernik katersuipput, tassuuna aqqutissiuunneqassalluni ujaqqanik pinnersaasiasssanik katersisartut pisinnaatitaaffiisa illersorneqarnissaat.

– Isumaqarpugut ujaqqanik katersinermik pinerluttunngortitsineq aporfissaliinerlu kiisalu oqaluttuarisaanikkut ileqqutsitullu pisinnaatitaaffivut inatsisitigut pisinnaatitaaffitsinnut akerliusoq aammalu oqartussaasunit pisariaqanngitsumik pissaanermik atornerluinerusoq.

Peqatigiiffiup oqaatigaa Kalaallit Nunaanni innuttaasutut nunaqavissutut ujaqqanik sunilluunniit suli katersisinnaanissaminnut innuttaasunit tapersersorneqarluarlutik.

– Pingaartumik ujaqqat naleqarluartut soorlu rubinit, inunnut ataasiakkaanut, ilaqutariinnut inuiaqatigiinnullu tamanut aningaasarsiorfiit pingaarnerpaat ilagisinnaavaat.

Powered by Labrador CMS