Aleqa Hammond tunuarpoq
Aningaasaqarnermut nunanullu allanut naalakkersuisoq Aleqa Hammond ullumimiit atuutilersumik tunuarniutini naalakkersuisut siulittaasuanut Hans Enoksenimut tunniuppaa.
– Aningaasaqarnermut naalakkersuisutut naalakkersuisut aningaasatigut aqutsinissamut ingerlatsinermullu siunnerfiannut akuersaarnanga akisussaaqataaffigiumanangulu peqataajunnaarnissannut aallaaviuvoq. Aningaasatigut ingerlatsineq pitsaanerusoq aqqutissiuussissutiginiarlugu siunnersuutigisakka, pitsaanngitsumik ingerlasoqarneranut aarlerisaarutikka aammalu ilimasaarutikka tusaaneqanngitsutut ipput aalajangerpungalu taamatut ingerlatsineq akisussaaqataaffiginiarnagu, Aleqa Hammond tusagassiutitigut allappoq.
– Aningaasatigut ingerlatsineq pingaarnersiuisoqannginneralu peqataaffiginiarnagu aalajangerpunga isumaqarama inuiaqatigiinnut aningaasatigut siunissami artukkiinissaq peqataaffigissanagulu illersorneqarsinnaanngitsutut isigangakku.
– Tunuarnera isigineqassanngilaq sapiuttutut kisiannili akisussaassuseqartutut iliuuseqarneruvoq naalakkersuisullu aningaasatigut ingerlatsinerat akisussaassuseqanngitsutut illersorneqarsinnaanngitsutullu isigagakku tunuarpunga, Aleqa Hammond allappoq.