Allakkerivik arriippallaaqaaq
Misissuinerit takutippaat Sisimiuni Nuummilu allagarsiassanik utaqqigaanni naammagittartariaqartoq.
Sisimiuni utaqqinarnersaavoq, allakkat nassiunneqarnerminnit taamaallaat 58,3 procentii aqaguani apuuttarlutik. Nuummi 59,9 procentiupput. Taamallu angusaqarneq ”akuerineqarsinnaanngilluinnarpoq”, Tele-Postip atuagassiaani Online-imi kingullermi taama oqaatigineqarpoq.
Qaqortumi allakkat ulloq ataaseq 89,8 procentii apuunneqartarput. Tamannalu oqaatigineqarpoq ”naammaginarpallaanngitsoq”. Paarlattuanik Ilulissani allakkat 99,1 procentii ullup ataatsip ingerlanerani apuunneqartarput. Tamannalu ”naammaginarluinnarpoq”, atuagassiamik oqaatigineqarpoq.
Taama uuttuineq sapaatit akunnerini 47-mi aamma 48-mi illoqarfinni sisamani ingerlanneqarpoq, tamatuminngalu isumaginnittuulluni kukkunersiuisut naalagaaffimmit akuerineqartut Nuummeersut Grønlands Revisionskontor. Taamaalilluni misissuisut arlaannaannulluunniit attuumassuteqanngilaq. Taamattaaq allakkeriveqarfiit ilisimanngilaat misissuinerit qaqugukkut ingerlanneqassanersut.