Issittumi ilisimatuut tikilluaqquneqarput
Issittumi inuiaqatigtiinnik ilisimatuut 300-t tallimanngornermi ulluni tallimani isumasioqatigiinnissaat - ICASS VI-mi - aallartimmat Katuarmi oqalugiartoqarlunilu erinarsoqatigiit erinarsorput.
Kalaallit Nunaata illoqarfiillu pingaarnersaata inuiaqatigiinnik ilisimatuut ilisimatuussutsikkut isumasioqatigiinnissaanni ICASS VI-mi (&th International Conference on Arctic Social Science) aaqqissuisuusinnaanerat naalakkersuisut Nuullu borgmesteriata Nikolaj Heinrichip nuannaarutigalugu oqaatigaat.
– Inuiaqatigiinnik ilsimatusarneq pillugu isumasioqatigiinnissaq Nuummi pisinnaammat nuannaarutigaara. Ukiuni arlalinni annermik pinngortitamut tunngatillugu ilisimatuussutsikkut ilisimatusarneq Kalaallit Nunaanni pisarsimavoq. Neriuppunga ICASS-ip inuiaqatigiit, innuttaasut ilisimatuullu akornanni suleqatigiinneq siuarsarumaaraa, Kulturimut, Ilinniartitaanermut, Ilisimatusarnermut Ilageeqarnermullu naalakkersuisoq Tommy Marø tikilluaqqusilluni kalaallisut oqalugiarnermini skærmerujussuakkullu takutinneqartumi oqarpoq.
Ullumikkut pingaarnertut oqalugiartoq tassaavoq Finn Lynge, taassuma nunatsinni imminermi nunasiaataassuseq oqaluuseraa, taanna isumaqarpoq, nunasiaassutsimik ingerlatsineq pisimasuusiq sulilu ullutsinni Kalaallit Nunaanni sunniuteqartoq.