Qilalukkat toquinnakkat 48-t assingi takukkit

Qilalukkat qernertat takornarianit nunanit allaneersunit nassaarineqarput Rømer Fjordip kujataata sinaani, Ittoqqortoormiiniit 50 aamma 100 kilometerinik kujasitsigisumi.

Isiginnittullu malillugit qilalukkat 500 meterinik isorartutigisumi siammartersimapput. Paasineqarpullu pissutigalugu takornariat tamaanngaannit 800 meterit missaannik ungasissusilimmut nunamut niutinneqarmata.

- Qilalukkat ilaat sivisuumik tamaaniissimarpasipput, tassa asiulersimagamik. Qilalukkat ilaat imaani ikkattumiipput allat sissamut amuneqarsimasut, isiginnittunit nalunaarummi atuarneqarsinnaavoq.

Nalunaarummi aamma atuarneqarsinnaavoq tuugaavi peerneqarsimasut, assigiinngitsorujussuusorli qilalukkat qanoq annertutigisumik tigusiffigineqarsimanerat.

- Qilalukkat qernertat inersimasut pingasut pilanneqarnissaattut pilanneqarsimapput. Allat mattaat piiaannarneqarsimapput neqaasalu ilaannaanik tigusiffigineqarsimallutik, nalunaarummi allassimavoq.

Qilalukkat ilaat pisarineqarami illaaqarsimavoq. Piaraa qanittumi imaaniissimavoq qalasialu suli atalluni.