Qilalukkanik pisimasoq kommunip politiinut nalunaarutigaa
Qilalukkat qernertat toqunneqarsimasut 48-t pillugit Ittoqqortoormiit Kommuniat takornariartaatinik umiarsuaatileqatigiiffimmit saaffigineqarpoq - tamatumalu kingorna suliassaq politiinut ingerlateqqippaa.
Umiarsuaatileqatigiiffik Aurora Expeditions, umiarsuaataani takornariartaammi ilaasuisa qilalukkanik toqunneqarsimasunik nassaarinnittoq, kommunimut saaffiginnissimavoq.
Kommunip politiit qinnuigisimavai pisimasoq misissoqqullugu, qulaajarneqarniassammat inatsisinik unioqqutitsisoqarsimanersoq, kommunaldirektør Otto Christensen paasissutissiivoq.
Tamatuma saniatigut borgmesteri Erling Madsenimut innersuussivoq, taassumalu oqaatigaa piniartunit qilalugarniaqataasimasunit nassuiaateqarfigineqarsimalluni.
- Piniariarfitoqaq pineqarpoq. Qilalukkallu sapaatip akunneri tallimaniit arfinilinnut pisarineqarsimapput. Taamaasilluni piniapiluttoqarsimanngilaq, borgmesteri Atassummeersoq erseqqissaavoq.
- Angalanermi kingullermi umiatsiaaqqat tallimat-arfinillit peqataasimapput. Piniartullu katillugit 30-35-inik qilalugarsimapput. Pisamik ilaat qimaannartariaqarsimavaat umiatsiani inissaqanngimmata. Tamanna aamma assinit tassanngaanneersunit takuneqarsinnaavkoq, tassa takuneqarsinnaammat plastikkinik puussiaqartoq qilalukkat neqaannik imalinnik. Siunertaasimavoq piniariartarfimmut uteqqinnissaq sinnerilu aallugit, taavali silarlulersimavoq, Erling Madsen nassuiaavoq.
- Ajunngilali qilalukkap ilaminiinnanngua tigullugu?
- Naamik taamaanngilaq. Tamatumunnga pissutaaginnarsimavoq silarlulersimanera piniartut piniariartarfimmut utersinnaajunnaartillugit. Akunnerni sisamani imaq ilulianik mallertorlugu angalaffigisussaavaat, borgmesteri tikkuaavoq.