Qilalukkat eqqissisimatitat Rømer Fjordimi pisarineqartut
Tunumi Rømer Fjordimi qilalukkat piaraat ikinnerpaamik marluk pisarineqarsimapput. Taamatut paasissutissiivoq Pinngortitaleriffik, aasaq manna piniariarfimmut tikeraarsimasoq. Uumasut eqqissisimatitaapput.
Taamaasilluni qularnartoqanngilaq qilalukkat qaqortat qernertallu illersorneqarnissaannik piniarneqarnissaannillu Namminersornerullutik Oqartussat nalunaarutaat 2004-meersoq unioqqutinneqarsimasoq. Tassani allassimavoq piaqqat arnavissallu piaqqisartut eqqissisimatitaasut.
Pisimasoq ilisimaneqalerpoq umiarsuarnik takornariartaammik takornariat nalaatsornerinnakkut piniariartarfik nassaarimmassuk, tassani qilalugarpaalussuit tuugaavi peerneqarsimallutik. Tamatumali saniatigut taamaallaat mattaat piiarneqarsimapput neqimerngannillu tigusisoqarsimalluni. Takornariat Ittoqqortoormiit Kommunianut tamanna saaffiginnissutigaat, kommunillu politiit qinnuigisimavai inatsisinik unioqqutitsisoqarsimanersoq misissoqqullugu.
Kisitsineq
Pinngortitaleriffik Rømer Fjordimukarsimavoq Tunumi qilalukkat amerlassusaannik kisitsiartornermut atatillugu.
- Piaqqat ikinnerpaamik marluk aallaaneqarsimapput. Tamanna qularutissaanngilaq, seniorforsker Mads Peter Heide-Jørgensen, Pinngortitaleriffimmeersoq oqarpoq. Taassuma ilanngullugu oqaatigaa Pinngortitaleriffiup isummerfigineq ajoraa inatsisinik unioqqutitsisoqarnersoq. Pinngortitaleriffiup taamaallaat isummerfigisarpaa piniarneq nungusaataannginnersoq, tamannarpiarlu biologit misissuleruttorpaat.
- Piniariartarfilli taanna kisimi taamaanngilaq. Arlalinni taamaattoqarpoq, Mads Peter Heide-Jørgensen oqarpoq.
Piniariartarfimmi qilalukkat 48-t takornariat kisissimavaat. Pinngortitaleriffilli isumaqarpoq taamak amerlatiginngitsut. Oqartussaasut qilalukkat 32-it kisissimavaat.
Unioqqutitsinerit amerlanerusut
Uumasunik eqqissisimatitanik pisaqarnermik saniatigut piniartut, qilalukkanik pisaqarsimasut, qularnanngitsumik aamma nalunaarummi malittarisassanik allanik unioqqutitsisimapput.
Taamaasilluni malittarisassani allassimavoq nerineqarsinnaasut atorneqarsinnaasullu tamarmik angerlaanneqassasut imaluunniit pissamaatigineqassasulluunniit. Tamatumalu saniatigut pilaffik sinnikunik atorsinnaanngitsunik salinneqartassaaq. Piniariarfimmili, takornarianit augustip 17-ianni Rømer Fjordimut pisunit takuneqarsimasumi, saliisoqarsmanngilaq.
- Qilalukkat 48-t kisippavut, taakkunanngalu pingasuinnaat pissusissaatut pilanneqarsimapput. Uumasut allat taamaallaat mattaat peerneqarsimapput neqaanillu tigusisoqarsimalluni, havbiolog Ingrid N. Visser, New Zealandimeersoq umiarsuarmullu takornariartaammut ilaasoq, oqarpoq. Uumasulli qanoq pineqarsimanerat tamakkiisumik takuneqarsinnaasimanngilaq arlallit imaaniimmata.
- Borgmester Erling Madsen, Ittoqqortoormiit, oqarpoq piniartut oqaluussimallugit. Pisatillu tamaasa tamaasa tigusimanngilaat pissutigalugu silarlulersimammat. Taamaasilluni angalanermik siulliup kingorna piniartut piniariartarfimmut utersinnaasimanngillat. Nassuiaat tamanna qanoq oqaasissaqarfigaajuk?
- Tupinnarpoq taamaassimappat piniartut uumasut sissamut amusimanngimmatigit atornissaat siunertarisimagunikku. Tamatuma saniatigut isumaqarpunga ileqqorluttuliornerusoq uumasunik atugarisinnaasanit amerlanerusunik pisaqarneq, biologi oqarpoq.
Ilalinngilluinnarpaat
Piniarsimaneq naalakkersuisut ilalinngilluinnarpaat, inatsisinik unioqqutitsilluni pisimappat. Naalakkersuisoqarfimmilu pisortap Amalie Jessenip oqaatigaa Namminersornerullutik Oqartussat Ittoqqortoormiit Kommunea qinnuigisimagaat pisimasumut atatillugu paasissutissanik amerlanerusunik nassiussaqaqqullugu.
- Politiillu paasiniaanerminnut atatillugu isumaqarpata unioqqutitsisoqarsimanera takujuminaatsoq taava uagut nammineq misissuisitsissaagut, Amalie Jessen Sermitsiaq.gl-imut oqarpoq.
Politimesterip tulliata Morten Nielsenip Sermitsiaq.gl-imut uppernarsarpaa, pisimasoq pillugu oqartussaasut ataasinngormat saaffigineqarsimasut.