Naamaartarnermut akiuiniarneq nutaaq
Ulluni makkunani PAARISA-mit meeqqat atuarfiinut, ilinniagaqarfinnut toqqakkanut, pinaveersaartitsinermik siunnersortinut aamma Nunatta Atuagaateqarfianut naamaartarneq pillugu atortussanik nassiussuisoqarpoq.
Atortussat imaraat taquaasivik, atuarnermi qaammatisiutit paasissutissartallit, yoyo, mobiliimut qilerut, saqqarmiuaqqat kiisalu naamaartarnerup kingunipilorisinnaasai pillugit quppersagaq.
Akiuiniarnermut tunuliaqutaavoq 2006-imi 6. klassiniit 10. klassinut atuartut akornanni peqqissuuneq inuulluarnerlu pillugit misissuisimaneq, taassuma takutippaa, meeqqat ilaasa naamaartarneq misilittaatigisarsimagaat kingunipilorisinnaasai ilisimanagit.
Atortussanut ilisarnaatigineqartoq tassaavoq siuteqqup qalerussamini qarasaq nammakkaa. Ilisarnaatikkut takutinneqarpoq, naammaartartut siuteqqutuulli kigaatsigilersinnaanerat. Naamaarnerup qarasaq ajoqusertarpaa. Samminnissinnaanerup ilikkagaqarsinnaanerullu ajornerulerneranik kinguneqarsinnaavoq kiisalu sivisuunik eqqarsartaatsikkut ajoqusiisinnaalluni, tusaasuusilersitsisarluni takusuusilersitsisarlunilu.
Atuarfiit aamma pissarsiarisimavaat ”Atuartut akornanni naamaartarneq pillugu iliuusissatut siunnersuut”. Angajoqqaat siunissami qaninnerpaami quppersakkamik pissarsisinneqassapput ”Angajoqqaat Naamaartarneq pillugu ilisimasariaqagaat”.
Sap. ak. 36-mi TV-kkut innuttaasunut paasisitsiniaasoqassaaq.