Arnat inuusuttut naalliupput
Arnat inuusuttut imminornissamik sakkortuumik eqqarsaateqartartut amerlaqssusiat ukiut 15-init ingerlaneranni marloriaatinngorsimapput. Inuuniarnermi atukkat, inooriaaseq peqqissuserlu pillugit misissuinermit erserpoq, arnat marluugaangata ataaseq imminoriartarsimasoq.
Annermik arnat 18-it 24-illu akornanni ukiullit imminoriartarsimapput, taakkunanilu amerlanersaat ilinniagakitsuullutik. Misissuinerup uppernarsarpaa, imminoriartarnerit, atornerluinerit pitsaanngitsumillu atugaqarluni alliartornerit imminnut attuumassuteqartuusut.
Ukiut kingulliit ingerlaneranni inuit imminornissamik sakkortuumik eqqarsaateqartarsimasut amerlassusiat (18 procent) 1993-imisulli amerlatigipput, taamanikkut Peqqissutsikkut Nakkutilliisoqarfiup innuttaasunik misissuinerat annertooq siulleq ingerlanneqarsimalluni, kisianni agguataarsimanerat malunnartumik allanngorsimavoq, Cecilie Petrine Pedernsen aamma Inger Kathrine Dahl-Petersen misissuinerminni taamak allapput.
Tassa 2005-2007-imi arnat 25-34-inik ukiuliit imminornissamik sakkortuumik eqqarsaateqarsimasut amerlassusiat ukiuni kingullerni marloriaatingorsimavoq. 1993-imi 8 procentiusimapput, kisitsisillu taakku 16 procentimut qaffassimallutik.
Angutinut tunngatillugu kisitsisit allanngorsimanngillat.
Ilisimatuut upariarpaat pitaaliuinermi suliniarnerit maanna aamma arnanut inuusuttunut sammitinneqartariaqalersoq aammalu atornerluinerit atoqatigiinnikkullu atornerluisarnerit immikkut ittumik suliniarfigineqarnissaat pingaaruteqartoq.
- Arnat taamak amerlatigisut imminornissamik eqqarsaateqartarsimappata imminoriartarsimappatalu arnat pingaartumik inuusuttut amerlasuut toqqissisimananngitsunik inuuneqarsimanerannut ersiutaavoq, ilisimatuut allapput.
Imminoriartarnerit peqqinnissaqarfiup uninngasunut nalunaarsuiffianni immikkoortillugit nalunaarsorneqarsimanngillat, kisianni tamanna peqqinnissaqarfimmik nakkutilliisoqarfimmi nakorsap Flemming K. Stenzip qanoq iliuuseqarfiginiarpaa, taanna sermitsiaq.gl-imut oqarpoq.
Imminornissamik eqqarsaateqaruit oqaloqatiginninnissamut siunnersorneqarnissamut periarfissat arlaqarput, ilaatigut kinaassutsimik taasinani sianerfigineqarsinnaasoq telefon 146. www.paarisa.gl tooruk.