Nuuk 280-liivoq
Nunatsinni illoqarfiit pingaarnersaat inuuissiorpoq. Tamanna malunnartinniarlu nunatta kulturikkut illorsuani Katuami kaffillertoqarpoq.
Ullumikkut ukiut 280-it qaangiussimalerput ajoqersuiartortitap Norge-meersup Hans Egede-p Nuuk tunngavilermagu iluatsinngitsumik qallunaatsiaanik ujaasigaluarnermini. Ulloq malunnartinniarlugu Nuutoqqami eqqaassutissiap »Sassuma Arnaa«-ta saavani oqalugiartoqarpoq Hans Egedep eqqaassutissaa qaqqajunnap qaaniit avammut isigerujoortoq.
Innuttaasut maanna Katuamut kaffisoriartoqquneqarput. Taannali sioqqullugu »Sassuma Arnaa«-ta saani oqalugiartoqarpoq.
– Ukiut makkua illoqarfitta Nuup ineriartortinneqarnera unigani ingerlajuarpoq, tamannalu aamma pissutigalugu innnutaasut amerliartortuarput, ilinniartitaanikkut, suliffissaqarniarnikkut, allarpassuartigullu, tamatumalu malitsigisaanik inissaqartitsiniarnikkut, meeqqeriveqarnikkut utoqqartattalu inissaqartitaanerisigut minnerunngitsumillu ilinniartitaanikkut suleqatigiilluta malinnaanissarput pisariuaqavissorpoq, taama oqaaseqarpoq Nuummi borgmesteriugallartoq Malînánguak Marcussen Mølgaard
– Illoqarfipput Nuuk periarfissarpassuaqarpoq perusuttuni minnerunngitsumillu illoqarfitta avatangiisia kusanaqisoq illoqarfittalu ungataa piniagassarpassuarnik peqartoq aammalu angalaarfigalugu alutornarluinnartoq, borgmesteriugallartoq oqarpoq.
Katuamut ingerlaaqatigiinneqarpoq kaffillernerlu ingerlavoq nalunaaqutaq ataatsimiit tallimat tungaanut.