Savissivik pilersorneqanngilaq
Nunaqarfik Savissivik nioqqutissanik qaammatini arlaqalersuni pajunneqarsimanngitsoq KNR paasissutissiivoq.
Qaanaap nunaqarfimmi Savissivimmi innuttaasut avatangiisiminnit puigorneqarluinnarsimasutut misigisimapput. Nunaqarfik nioqqutissanik piffissami sivisuumi pilersorneqarsinanngilaq, aammalu innuttaasut pilersorneqarnissamik kissaataasa piviusunngornissaat nalorninarpoq.
Qaarngaaq Nielseni KNR radioaviisimut oqaluttuarpoq, pisinniarfituartik nioqqutissaarulluinnarsimasoq, aammalu Pilersuisumiit aggustip 9-ani aatsaat pilersorneqarnissaat ilisimatitsissutigisimagaa. Taamaattoq sapaatipa akunnerata siuliani qulimiguulik nioqqutissanik qerisunik pajulluni tikissimavoq.
- Qulimiguulik tikimmat nuannaaqaagut, naak nioqqutissat akisugaluaqisut, qaangiuttoornissaannullu killiliussat qaangiutereersimagaluartut, Qaarngaaq Nielsen oqarpoq.
Nammineq paasisai naapertorlugit nioqqutissanik pilersorneqarnerat ukiuni kingullerni malunnartumik ajorseriarsimavoq.
- Tamaana assorsuaq puullaaqinarpoq, avatangiisitsinnit puigorneqarluinnarsimasutut misigisimavugut, Qaarngaaq oqarpoq.
Upernavimmi Pilersuisumiit oqaaseqartitsineq ajornarsimavoq, knr.gl allappoq.