Akiliinerluttut Palle C.’p nalunaarsorterusukkai
Inuit akiliinerluttut, soorlu kigutit nakorsaanut akiligassaminnik qimarratiginnittut, Kalaallit Nunaanni akiitsoqartut nalunaarsorneqartarfianik pilersitsiniarluni demokraatineersoq piareersimavoq.
Politikeri kigutit nakorsaat Palle Christiansen Demokraatineersup akiliinerluttut qatsuppai. Qarasaasiakkut oqaloqatiginnittarfini www.palle.gl aqqutigalugu siunnersuuteqarpoq, inuit akiligassaminnik akiliisanngitsut pillugit Kalaallit Nunaat nammineerluni nalunaarsuiffiliortariaqartoq. Maannakkutut itsillugu inuit akiliinngitsooraatata soriarsinnaarpianngilagut, Palle Christiansen erseqqissaavoq.
Arnaq inuusuttoq 8.000 kronit nalinginut kigutiminik suliaritittoq assersuutigaa, kigutit nakorsaat isumaqatigalugu naafferartussaagai. Arnarli inuusuttoq akileerusunngilaq. Akiliinissaanik nukingisaarneqarpoq, kinguneraalu eqqartuussivik aqqutigalugu akiliinissaminik pineqaatissinneqarluni. Suli akiliisanngilaq. Taamaammat akiliisitsiniartartunut tunniunneqarpoq akiitsuni akilerniassammagit. Suli akilisanngilaq.
Namminersorluni inuussutissarsiuteqartup inatsisitigut qularnaarinissaa sumiippa? Tillinneq sooq kinguneqartinneqassanngila? Palle Christiansen aperivoq.
Akiitsut amerliartuinnartarneri annikillisinniarlugit qitiusumik nalunaarsuiffiliornissaa siunnersuutigaa, akiliinerluttut ”nittarsaattarnerisigut”, iluarsineqarsinnaallunilu nunatsinni inuussutissarsiutinik ingerlatsisut GER-ikkut nalunaarsorsimasut kisimik iserfigisinnaasaannik.
-Inuussutissarsiutinik ingerlatsisut namminersortut allat suliniummik aallartitsinissamik sapiissuseqarpata, taama tillinnerit annikillisinnaassutaannik, tamanna tapersersueqataaffigerusuppara. Inatsisinik allanngortitsinissamik pisariaqartinneqarpat, tamanna pillugu aamma ikiuuffigisinnaavara, Palle Christiansen nalunaarpoq.