Ilitsersuisoqarneq maligassiuisussanik periarfissiissapput
Foreningen Grønlandske Børn Nuummi inuusuttunik amerlanerusunik ilinniarnermik aallartitsinissamut ilitsersuisoqarnermik suliniuteqarpoq. Sullinneqarniartut tassaapput Atuarfik Samuel Kleinschmidtimi 9. klassit.
Maanna Foreningen Grønlandske Børn (FGB) ilitsersuisussanik 18-30-nik ukiulinnik pissarsiorpoq, sapaatit akunneranut akunnerni pingasuni-sisamani piffissaqarsinnaasunik, Nuummi inuusuttunut inooqatigiinnikkut suliaqarfitsigullu sammisaqarnernik aaqqissuinikkut inuusuttunik ikorfartuisussanik.
Ilitsersuisoqarnissami siunertaavoq nuummiut amerlanerit meeqqat atuarfiat naammassereernerani inuusuttut ilinniarfiini aallartitsinissaannut ikiuttussat aamma/imaluunniit ilinniarnermut qinnuteqarnissamut aamma naammassinnissamut pitsaanerusunik tunngavissaqartsinniarlugit, FGB nittartakkamini allappoq; fgb.dk.
Suliniummi siunniunneqarput; Nuummi Atuarfik Samuel Kleinschmidtimi (ASK) 9. Klassit. Qeqertarsuatsiaani atuartut nunaqarfimmit 9. klasse aallartinniarlugu nuullutik ASK’mi aallartittussat, klassinut marlunnut avinneqartussaasut. Ukiumi atuarfiusumik 2008/2009-mi atuartut katillugit 38-t 9. klassimi aallartissapput; 9.A-mi atuartut 19-it, 9.B-mi atuartut 19-it.
Ilitsersuisut tassaassapput inuusuttut piumassutsiminnik sulisut (20-35-nik ukiullit), angutit arnallu ilinniarnermik ingerlatsisut imaluunniit ukiut kingulliit tallimat ingerlaneranni ilinniarnermik naammassinnissimasut maannalu sulilersimasut.
Ilitsersuisutut sulineq aallartissaaq septembarimi ukiup atuarfiusup 2008/2009-p aallartinnerani, aturtullu ukiuni atuarfiusuni marlunni malinnaaffigissallugit, t.i. juni 2010-mi 10. klasse naammassinissaata tungaanut. Suliniummi suleqatigineqassaaq Ungdommens Røde Kors, Danmarkimi meeqqat atuarfianni atuartunik ilitsersuisuuteqartarnermik misilittagaqartut.