Balslev-Clausen-imut Nersornaat
Nutartigaq: Inatsisartut siulittaasuata Ruth Heilmannip sisamangornermi Inatsisartut nersornaasiuttagaat, Nersornaat silviusoq provst Erik Balslev-Clausenimut Danmarkimi tunniuppaa.
Erik Balslev-Clausen Københavnimi Østerbro-mi oqaluffinnut qulingiluanut provstiuvoq. Nersornaasiineq persuarsiorfiusumik pivoq Kalaallit Nunaata Sinniisoqarfiani, Nordatlantisk Brygge-mi nal. 14:00.
Nersornaammik silviusumik Provst Erik Balslev-Clausenimut nersornaasiinerup tunngavigaa Kalaallit Nunaanni ilagiinnut annertuumik suliaqarnera kiisalu Kalaallit Nunaata Danmarkillu akornanni ilageeqarnermi pitsaasumik attaveqarnerup attatiinnarnera.
Erik Balslev-Clausen ukiut 30-t sinnerlugit Kalaallit Nunaanni ilageeqarnermut annertuumik suliaqarsimavoq. Taamattaaq Erik Balslev-Clausen Nunanut Avannarlernut ilageeqarnikkut kiisalu inuiaqatigiinnut Inunnut allanut ilageeqarnikkut attavinnik pilersitsisimavoq.
Erik Balslev-Clausenip suliniuteqarneratigut ullumikkut TUSSIAQATTAARUTIT 1 aamma 2-mi tussiutinik tussiarsinnaavugut, inatsisartut siulittaasut Ruth Heilmann tusagassiuutitigut nalunaarummi allappoq.