Olivinimik piiaaffik annikillisaavoq
Assartuinermi akit qaffasissut sakkortuumillu unammillerneqarneq pissutigalugit Seqi Olivine A/S-ip tunisassiornini annikillivaa.
– Naatsorsuutigaarput 2008-mi olivinimik 600.000-700.000 tonsimik tunisassiussalluta.
Taamatut oqarpoq pisortaq Robert Näslund, Seqi Olivine A/S-imeersoq, taannalu Nuup Maniitsullu akornanni Niaqunngunami olivinimik piiaaffimmik ingerlatsivoq.
Piiaaffik naatsorsuunneqarsimavoq ukiumut 2 millioner tonsinik tunisassiortartussasut, imaatigulli assartuinermi akit qaffasinnerat olivinimillu tuniniaavimmi sakkortuumik unammillerneqarneq pissutigalugit selskabip tunisassiornini annikillisariaqarpaa.
– Ullumikkut 30-nik sulisoqarpugut, Robert Näslund Sermitsiamut oqarpoq.
Piiaaffik ukiut pingasut matuma siornatigut atulermat sulisut affai inulersimavai. Seqi Olivine A/S olivinimik avammut tuniniaalerpoq 2005-ip afffani kingullermi ukiullu naannginnerani olivin 91.000 tonsi avammut tunisimallugu.
Robert Näslund ukiut marluk matuma siornatigut oqarpoq olivinimik piiaaffimmi ammasumi anguniagaasoq 1,1 million tonsimik tunisassiornissaq 40-nik sulisoqarluni.
Sermitsiaq atuaruk.