Qimarnuiit meerartaat Marymit tunissutisipput
Mary Fonden nammattakkanik 7500-nik qimarnuinnut agguaavoq, ilaatigut Sisimiunut, Ilulissanut, Paamiunut Qaqortumullu.
Meeqqat anaanartik ilagalugu nunatsinni qimarnuiit arfiniliusut arlaannut isernerminni kronprinsesse Marymit nammattakkamik tunissutisisalissapput.
Nammattakkap imarai bamseq, kigutigissaatit, atuagaq aqerluusallu.
Nammattakkat Maryp aningaasaateqarfiata, Mary Fondenip, aningaasaliiffigai, Kunngissakkut katinneranni tunissutinit 1,1 millioner kroninit nunatsinni Danmarkimilu katersorneqartunit ilaatigut aallarniuteqartup.
Aningaasat ilaat maanna utertussanngorput, qimarnuinni meeqqanut tunissutitut.
Iliuuseq kusanartoq
Qaqortumi qimarnuiup Sikkersup nammatakkat qimarnuinnut agguaannissaat isumagisussaavaa, qaqugorpiarli tamanna pissanersoq suli ilisimaneqanngitsoq, Sikkersup pisortaa Eva Kleist oqarpoq.
Nammatakkanik tunissuteqarneq Eva Kleistip iliuusaasoraa kusanartoq.
- Qujanartorujussuuvoq meeqqat qimarnuinniittut taama eqqarsaatigineqarmata, asuli maangaannaq ilisatut misiginnginnissaat pillugu, Eva Kleist oqarpoq.
Nunatsinni qimarnuinnut saaffiginnittartut affaat missiliorlugit meeraasarput, anaanartik ilagalugu qimarnusut. 2006-imi arnat 706-it meeqqanik 342-nik saaffiginneqateqarput.
Annersaaneq isiginiarpaa
Mary Fondip ilaqutariinni annersaaneq immikkut isiginiarpaa, ajornartorsiutillu saqquminerulernissaa sulissutiginiarpaa.
Kronprinsesse Maryp nammineq ajornartorsiut tamanna soqutigisorujussuuaa.
- Ilaqutariinni annersaaneq tamatta susassaraarput, neriuutigaaralu angerlarsimaffinni annersaasarneq siunissami eqqartorneqarnerulissasoq. Pingaaruteqarpoq eqqorneqartut isiginiarneqarnissaat, tusaaneqarnissaat akuerineqarnissaallu, Århus Stiftstidendemut oqarpoq.