Great Greenland eqqunngitsumik unnerluutigineqarpoq
Ukiup affaani siullermi Great Greenlandip amiutaanik tunisineq siorna piffissamut tassunga sanilliullugu 14 procentimik appariarsimavoq.
Pisortap tunuarsimasup Michael K. Nielsenip tunngavissaqanngitsumik unnerluutigineqarnera Great Greenlandip suli artorsaatigaa.
Ilaatigut aningaasanik peqquserlussimanermik unnerluutiginnipput naalakkersuisunut ilaasortaq Finn Karlsen Atassummilu politikerit nuimasuut allat, tamannalu pivoq 2006-imi upernaakkut. Michael K. Nielsenilu ilaatigut kukkunersiuinermut nalunaarusiatigut arlalitsigut pinngitsuutinneqaraluartoq, ilatigullu pisortatigoortumik naalakkersuisut siulittaasuannit Hans Enoksenimit, Siumut, utoqqarserfigineqaraluartoq nunani allani amernik sammisaqarfinni unnerluussutit suli kaaviiaarput. Tamannalu pissutigalugu ingerlatsiviup tuniniaavinni tamakkunani ammit tuninissaat ajornakusoortinneruvaa. Taamaasilluni ukiup affaani siullermi Great Greenlandip tunisai 14 procentimik ikileriarsimapput.
Ammit tunisat ilivitsunngorlugit kinguariaataat ammit 6.600-uupput, taamaasillunilu 2008-mi qaammatini siullerni arfinilinni tunisat 49.400-nut ikileriarsimapput.
– Tuniniaavik malussajasuararsuuvoq. Pisisorisinnaasatta soorunami misissortarpaat uagut aamma Michael K. Nielsen, ullumikkut ingerlatsivimmut suli attuumassuteqartoq amernik tuniniaanermut atatillugu, pillugu qanoq allaaserinnittoqarsimanersoq. Tamatumunngalu atatillugu oqaluttuatoqqat suli qaqilerneqartuarput. Niuernermut pitsaasumik aallaaviunngilaq nassuiaassuteqarnissaq imminullu illersornissaq, Great Greenlandip pisortaa Henrik Estrup erseqqissaavoq. Taassuma Michael K. Nielsen kingoraarlugu majip 15-ianni pisortanngorpoq.
Annerusumik atuarsinnaavutit Sermitsiami tallimanngornermi saqqummersumi.