Saviminikunik katersuinissaq akisuallaassaaq
Nuup Kommunia KANUKOKA-p saviminikunik saffiugassanillu katersuilluni suliniutaanut ilaanngilaq, katersuinissaq aningaasaqarnikkut imminut akilersinnaanavianngimmat, nuuk.gl allappoq.
Avatangiisinik aningaasaqarnikkullu soqutigisanik illersuineq kiisalu inissiiffissaaleqineq, tamakkuupput Nuup Kommuneata KANUKOKA-p saviminikunik saffiugassanillu katersuiniarluni suliniutiginiagaanut ilaaniannginneranut peqqutaasut. Tamanna ukiualuit matuma siorna aalajangiunneqarpoq. Katersuiniarnermi kommunimut akisuallaalersinnaavoq. Saviminikunik eqqaaviup – ilaatigut saviminikunik saffiugassanik eqqaaviusartup – assanneqarnissaannaanut 20-30 mio. koruuninik akeqartussaavoq.
- Tamatuma saniatigut savinikunik umiarsualimmut assartuinerinnaq ataaseq 300.000 koruuneqarpoq. Eqqarsaatigigaannilu kommunip saviminikunik eqqagassai Kalaallit Nunaanni illoqarfinni saviminikunik eqqagassat tamakkerlugit amerlaqatigigai taava tamanna kommunimut akisuallaalersinnaavoq, Ole Abrahamsen Nuup Kommuneani teknikkeqarnermut avatangiisinullu immikkoortortaqarfimmi avatangiiseqarnermut immikkoortortami aqutsisuugallartoq taama oqarpoq.
Taamaammat Nuup Kommunea aalajangerpoq eqqagassat navianaatillit nunani allani qularnaatsumik suliarineqartussanngorlugit nassiunneqartaannassasut saviminernullu eqqaavik atuinnarneqarluni. Tamannalu kommunip anguniagaanut, tassalu ”aningaasat atugassarititaasut naapertorlugit avatangiisit innarlerneqarnissaat mingutsinneqarnissaallu pinaveersaartinneqarlunilu annikillisarneqassaaq”-mut naapertuuppoq.
Nuup Kommunea saviminikunik eqqaaviup paavani erngup qanoq issusaanik misissuiuartarpoq. 2007-mi misissuinerni akooorutissat 220-t pinngortitameeriinngitsut misissuivigineqarput. Misissuinerit takutippaat akoorutissat amerlanersaat annikitsunnguamik mingutsitsisut, misissuinerilli aamma takutippaat imaq eqqaaviup avataaniittoq nikkel-imik mingutsitsiffiusimasinnaasoq. Pineqartulli imeq aqqutigalugu seerinerat ukiumut annikitsuaraapput, avatangiisinullu sunniuteqarnissaat ilimagineqarani. Ataatsimullu nalilerneqarpoq saviminikunik eqqaavik Nuup kangerluanik eqqasunnarsinnaasumik mingutsitsinngitsoq.