Timmisartunut ikummatissat 600 liiteri utsersortoq
Nutartigaq: Mittarfeqarfiit tankbiiliannik immiineq ajutoorpoq, Ilulissani ikummatissaasivik ulikkaareernikoq immerniarneqartillugu.
Mittarfiup tankbiilia ullaap tungaa immissammat timmisartut ikummatissaat A1-imik taaguutilik 750 liiteriit missaat avammut kuuppoq.
Ilulissani mittarfimmi ingerlatsinermut aqutsisoq Marius Møller sermitsiaq.gl-imut oqarpoq, tamanna sulisut Polaroilimut orsussamik aallarsut kukkunerannik peqquteqartoq.
- Timmisartup orsussaanik ullut tamaasa aallertarpugut, aallartinnatalu tankbiilit tankiat imaqarnersoq misissoqqaartarparput. Pisumi uani tankip aappaa ulikkaarsimavoq, paasineqarsimanngimmallu kukkuneq assut ajuusaarnarpoq, Marius Møller oqarpoq. Taassuma erseqqissarpaa maloittarisassat maanna sulisunut erseqqissaassutigineqarsimasut.
Mittarfeqarfiup tankbiilia KNI-p tankeqarfianiit qatserisartunit ajutoortoqassagaluarpat piareersimasunit nusunneqartariaqarsimavoq.
Ilulissani tankeqarfimmi aqutsisup Flemming Lassenip ilisimatitsissutigaa, timmisartup orsussaa 600 liiteri maanna nappartanut immiunneqarsimalersoq, sinneralu sioraasanut uuliamik milluaasinnaasunut milluartinneqarsimasoq kommunillu ikuallaasarfianut tunniunneqarsimasoq, malittarisassat malillugit.
- Atortoq assut pitsaasuuvoq orsussarlu tamarmi maanna peerpoq, Flemming Larsen oqarpoq.