Ilulissat eqqaanni pinngortitami ikuallattut marluk
Pinngortitami ikuallattut Ilulissat kommuneata avannaatungaaniittut qaminniarlguit qatserisartut ilungersorput.
Nunaqarfiup Qeqertap kujataani Eqi Sermiani ikuallattoq paasineqarneraniit ullut 16-init qaaniutereersut suli qaminneqanngilat. Ilulissaniit, Saqqamiit Qeqertamiillu qatserisartut 15-init nikittaallutik nunamut ikuallaffiusumukartarput inneq qaminniariartorlugu, kisianni periarfissaqanngiusavipput, qatserisartut pisortaat Ole Kreutzmann oqarpoq.
- Imermut ungasissumiipput, tatsinut imaanullu, taamaattumik nunap ilaani takusinnaasatsinnik ikuallaffiusumut anngunniarneq ajornakusooqaaq, Ole Kreutzmann oqarpoq.
Qatserisartut ikuallattoqarnerani pumpet tallimat atorpaat, kisianni taakku ikuallaffiusumut tamarmut anngutitinniarlugit naammanngillat.
- Sialuk ikuallattumik qamivitsitsissinnaasoq assorsuaq amigaatigaarput, qatserisartut ittuat anersaaruluppoq.
Sumiiffimmi allami Eqip kujataani kangerlummi Paakitsumi aamma ikuallaqttoqarpoq, tassani aamma qatserisartut Oqaatsuneersut Ilimanameersullu qatserillutik aallartereerput.
Ilulissat kommuneani qatserisartut pisortaata naatsorsuutigaa ikuallattunik qatserinerni aningaasartuutit 300.000 kr.-it missaanni akeqartussaassaaq.
Kommunimi upernaaq allartimmalli arlalinnik ikuallattoqartarsimavoq, ilaatigut mittarfiup aqqutaani ikuallannerit pingasut. Kommunip maanna pinngortitami innermik ikitsinissaq inerteqqutigilersippaa.