Iluliarsuarnut isikkivilik
Ilulissani Hotel Arctic internetimi nutaamik quppernertaarpoq, taamalu www.hotelarctic.com-imi nutaarsiassat ilagaat webcam-i Ilulissat kangerluannut sammisoq.
Kamerap isikkivik hotelimi inisimasut misigisinnaasaat takutippaa - kamera init ilaanni igalaamut inissitaavoq. Assit nutartertuartut 5 minutsikkaarlugu nutartertartut aalisariutit iluliarsuillu kangerluup 56 kilometerinik takissusillip paavaniittut takutittarpai. Iluliarujussuit nunarsuup affaata avannarliup sermimik uukkaaviit annersaasa ilaanniit Sermeq Kujalleq-mit pisuupput, iluliarsuillu immap naqqani ikkannermi marraannaasumut ikkarlittarlutik. Ulikkaangat aatsaat kaanngartarput, imaluunniit aseroraangamik ulikartarlutik. Infomedia.dk allappoq.
Hotel Arctic-ip sisamanik ulloriartalikkap immikkoortoq pingasunik qaleriilik 33-nik initalik atoqqaarteqqammerpaa. Tassani ininit tamaniit, neriniartarfimmiit, brasserie-miit (nerisarfik) ataatsimeersuartarfimmilluu Sermeq Kujallermut, Qeqertarsuup sulluanut Ilulissallu illoqarfianut isikkiveqarpoq. Init avannamut sammisut ineqarfioqqaartumiittut decembarimi ataatsimeersuartarfiliornermut atatillugu atorunnaarsinneqarsimapput.