Arnannguup nipilersornermik ilinniarfik qimappaa
Qarlortartartup Arnannguaq Gerstrøm nipilersornermik ilinniarfimmi suliunnaarpoq, kisianni nipilersorneq Nuullu qimanngilai, nuuk.gl allappoq.
Nipilersornermik Ilinniarfik Nuummi nipilersornermik ingerlatsinermi pingaarutilimmik inissisimavoq, kisianni inuit pingaarutillit ilaat allanik misilittagaqarniarluni maanna taamaatinniarluni aalajangersimavoq. Arnannguaq Gerstrøm nipilersornerik ilinniarfimmi ukiuni sisamani sulisimavoq, kisianni konservatoriami qarlortartartutut ilinniarsimasuulluni perorsaasutut sulinissaa taamaattussaariinngikkaluarpoq.
- Københavnimi musikkonservatoriami naammassigama nipilersornermik ilinniarfimmi sulilernissamut neqeroorfigineqarpunga. Aallaqqaammut nangaagaluarpunga - qullersaqarfimmummi tunngatillugu ilinniannginnama, kisianni sulilerniarlung angerama nuannaarutigaara, tassami tassaniinnera assut ilinnniarfigaara, aammalu ilinniarfiup nipilersortartoqatigiivi ineriartorsimasut takusinnaasimagakkit, Arnannguaq Gerstøm oqarpoq.
Kalaallit Nunaanni klassiskimik ilinniarsimasut taamatullu inuussutissarsiuteqartut ikittuinnaapput. Arnannguaq Gerstrøm kalaallini kisiartaagunarpoq nipilersornermi klassiskimi konservatoriami ilinniarsimasoq.
Tusarnaartitsineq kingulleq
Nipilersornermik ilinniarfimmut inuulluaqqusinissaq tullinnguuppoq, aamma Arnannguaq Gerstrømimut aalajangerneq oqitsuinnaasimanngilaq.
- Nipilersornermik ilinniarfik qimanniarlugu ajornartorujussuuvoq. Ilinniartuuinnut nuannersumik attaveqarsimavunga, ilinniarfiullu nipilersoqatigiivinut assut akuusimallunga. Taamaattumillu aamma Nuuk Byorkesteri peqatigalugu naggataamik tusarnaartitsigallarnerni qullililaartariaqarsimallunga, tusarnaartitsinermi aamma Trut Brass Band Københavnimeersut tusarnaartitsieqataapput, Arnannguaq Gerstrøm oqarpoq.
Arnannguaq nammineq Nuuk Byorkesterimi 1991-imiiy 1993-imut ilinniartuusimavoq, aammalumi frelancertutu ilinniarfimmut attuumassuteqarsinnaanini itigartivinnagu.
- Maani Nuummi nipilersornerup tungaatigut suli suliassaqarpunga - saniatigullu angajoqqaakka suliffeqarfiutaannik - Usisaat-mik - ikiorusuppakka, Arnannguaq Gerstrøm oqarpoq. Arnannguaq aamma Niels Brock-imi akademimerkonom-imut ilinniarsimasuuvoq.
Nipilersornermik ilinniarfimmi ilinniartitsisutut nakkutilliisutullu sulineq tassa, atorfillu taannaaggutsip 1-iani inuttaarutissaaq.