Tilliffigitinnak feeriarit

Københavnimi Kalaallit Illuutaanni tusarfiit ilisimatitsissutigaat, ullumikkuinnaq kalaallit takornariat marluk tilliffigitissimallutik aqqusaartut. Kalaallillu nalinginnaasumik tillinniat kaasarfissiuisartut ilisimasaqarfiginnginnamikkit tillinniarfigitinnermillu sungiusimasaqanngitsut tamanna Kalaallit Illuutaanni takornartaanngilaq.

Oqaatigineqassaaq aasaammat - taamalu aamma Danmarkimi tillinniat kaasarfissiuisartut ulapinnerpaaffiat nallermat. Ullormut arlalippassuariarluni pisarpoq, sukkaqisumillu ingerlasarluni. Mittarfissuarmi aallariartortarfimmi tikittarfimmilu, Hovedbanegårdimi, Strøgimi, S-tog-ini bussillu unittarfiini pisarput.

Tassa inuppassuit katersuuffianni ajattaaffiusinnaasuni. Kisianni aamma hotelip neriniartarfiani pisinnaavoq, taskit imaluunniit jakkit qimalaarlugu kaffimik aallernerpit nalaani.

Aajuku Københavnimi Politiit pinerluttaalisitsinermut immikkoortortaqarfianiit "siunnersuutitsialaat":

• Aningaasaatitit, kreditkortit pingaarutillillu allat timinnut tussimatikkit.

• Pigisatit nalillit nammattakkavit kaasarfiini silarlermiitinngisaannakkit

• Taskit tuermiut siittartulimmik silarlermi kaasarfeqarpat kaasarfii timinnut tussimatinnissaat isumagiuk.

• Pigisatit nakkutigineqartinnagit qimanngisaannakkit - 15 sekundiniluunniit. Imaassinnaavoq tillinniap kaasarfissiuisartup minutsini arlalinni nakkutigisimagaatit arlaatigut mianersuaalliornissat utaqqiinnarlugu.

• Tillinniat kaasarfissiuisartut arlalikkaarlutik suleqatigiikkajuttarput, taava ataatsip aqqummik aperaluni, sikutukkani nakkallugu imaluunniit ketchumik seqertoorlutit allatulluunniit allamut saasaraatit alla tillinniarluni aallarteriissaaq.

• Kreditkortinik arlalinnik peqaruit ataatsikkut annaajumanagit avissaartissimakkit.

Tilliffigitissimaguit politiit piaarnerpaamik saaffigissagitit innersuussutigineqarpoq. Københavnip mittarfissuani, Hovedbanegårdimi Halmtorvet 20-milu politeeqarfiit ulloq unnuarlu inoqartarput. Sillimmasersimanerit eqqarsaatigalugu nalunaarutiginnissaatit, kisianni aamma pigisatit nassaarineqassagaluarpata attavigineqarsinnaaniassagavit. Aamma tillinniat taamaallaat aningaasat immaqalu visakortit kisiisa tigugajuttarpaat, sinnerilu eqqaavipput igittarlugit.

Kortit matutiguk:

Akiliut, U18-korti, Dankorti, VISA/Dankorti, Visa Electron imaluunniit Mastercard: Uunga sianerit 44 89 29 29 (ulloq unnuarlu ammavoq), bankip aqqa illillu cpr.nr.-mut nalunaarutigikkit. Grønlandsbankip Danmarkimi Den Danske Bank suleqatigaa, aamma Sparbank Københavnimi immikkoortortaqarfeqarpoq.

Diners: Sianerfissaq 36 73 73 73 - kontonormut imaluunniit cpr.nr.-mut nalunaarutigiuk.

Aamma Strøgimi uukapaatitseriallammaat unammillinnginnissaat pingaaruteqarpoq. Kugle innerit puuani sorlermiittoq eqqorsinnaagukku aningaasannapallannissamik ussiataarisarput. Puut sukkasuumik nikittaatsinneqartarput, taamalu pooq sorlerluunniit toqqaraluarukkut kugle peqanngilaq - assaaniippoq. Taamaallaat 100 aamma 500 kr.-nit aningaasanoorutigisinnaavatit, tamatigullu annaasussaallugit. Naammagittaallioriassagaluaruit akinissartik ersiginngilaat tamatigullu amerlanerujuaannarlutik.

Eqqarsarluarit, pigisatit paarikkit Danmarkimilu feeriarluarina, politiit pitsaaliuinermut immikkoortortaanit kissaassipput.