Nuuk takornarianik ulikkaassaaq
Umiarsuit takornariartaassuit marluk takornarianik 3000-inik nunarsuarmit tamaneersunik ilaasullit ullumikkut Nuummut tikissapput, knr.gl allappoq.
Nal. 8.00 Japanimiut takornariartaassuat "Clipper Pacific" Nuup umiarsualiviani talittarfimmut tulassaaq, Japanimiunik takornarianik 1000-inik ilaasoqarluni.
Nal. 9.00 takornariat 2000-ingajaat allat tikissapput - Amerikamiut, tuluit nunanillu allaneersut - umiarsuarmut takornariartaassuarmut "Aurora"-mut ilaasut. "Aurora" Nuup saavanut kisassaaq, tassanngaaniillu tikeraarpassuit umiatsiarsuarnik ikaassussallugit.
Nuummi takornariarnermik ingerlatsiviup pisortaata Flemming Nicolaisenip takornariarpassuit takkussuunnissaannut piareersimallutik. Kulturikkut illorsuarmi Katuami katerittoqassaaq, ilaatigut erinarsoqatigiit erinarsussallutik tivasoqassallunilu, tamatumani takornariat namminneq peqataasinnaallutik, soorli aamma tammajuitsussanik tuniniaasoqassallunilu illoqarfimmi angallassisoqassasoq.
Flemming Nicolaisenip Nuummi innuttaasut qinnuigai sissiukkap tungaanut tasassumalu eqqaanut namminneq biiliminnik biilernaveersaaqqullugit.