Århusimi kalaallit malersorneqanngillat
Kalaallit Århusip eqqaani Gellerup Parken-imi najugallit ammip qalipaataa tunngavigalugu assigiinngisinneqarnerat ukiup aappaa qiteqqillugu Århusimi Kalaallit Illuanni maluginiarneqarsimanngilaq.
Aviisip Århus Stifttidende-p sapaatip-akunnerata naanerani allaaserisaani kalaallit malersorneqarneranik oqalunneq eqqunngitsoq, Kalaallit Illuanni inunnik isumaginninnermut siunnersorti Simon Lynge oqarpoq.
- Ilisimasagut malillugit taanna allaaserisaq ukiup ataatsip affallu matuma siornagut pinikuuvoq, taavalu qangarnisaagaluartoq allaasereqqinneqarluni massakkut. Kinguneqartitsisaramik tamakku siornatigut pinikuusimasut allaasereqqikkaangamikkit, Simon Lynge nassuiaavoq.
Assersuutigaa kalaallit arnap ippassaani arfininngormat misigisaa.
- Ullaap tungaagut sianerfigineqarpugut kalaallimit Gellerupimi najugaqartuusumit oqaluttuartumik inuusuttuaqqaninngaanniit igalaava milloorneqarsimasoq aserungajaavillugu. Taassuma Gellerupimi ukiorpaalunni najugaqartup najukkani ukiorpaalunni najugaqartup najukkani nuannarisorujussuuaa. Siornatigut ajortumik misigisaqarnikuunngilaq, aatsaalli Århus Stifttidende-p allaaserinninnerata kingunerisaasa pisoq ilagaat, Simon Lynge nassuiaavoq.
Nalinginnaavumik kalaallit eqqissisimasorujussuarmik Gellerupimi ingerlagaluarput.
Århusimi Kalaallit Illuata allaaserinneqqinnerit nuannarinngilaat.
- Kalaallit illuanninngaanniit nuannarinngilaarparput taamatut allaasereqqinneqarnera. Massakkut pissutsit taammaannginnamik.
Simon Lynge aamma oqarpoq, arnaq igalaaminik milloortittoq politiinut suliassanngortitsereersoq.
Kalaallinik arlalinnik Gellerupimi ineqarnerminnik nuannarinnittunik suli najugaqartoqartoq ilanngullugu ilisimatitsissutigaa, nuannarinninngitsut ukiut marluk matuma siornagulli Århusip Kommunea suleqatigalugu allamut nooreersut aamma oqaatigalugu.
Gellerupimi najugallit quliugaangata qulingiluat nunanit allanit kingoqqisuusarput.