Isorliunerusunut timmisartorneq akitsorpoq
Nutartigaq: Qaanaamiit Upernavimut nunaqarfinnullu angalanermi billetsit Air Greenlandip akitsorpai.
Uuliap sukuluiarneqanngitsup akitsoriartuinnarnerata nunaqarfiit isorliunerusullu eqqorpai. Ullumimiit atuutilersumik billetsit illuinnaanoortut 10 kr.-imiit 135 kr.-mik akitsorneqarput.
KNI-p qanittukkut uuliamik 50 ørimik akitsuinera billetsit akitsornerannut pissutaasoq, Air Greenland ilisimatitsivoq.
- Namminersornerullutik Oqartussanut kiffartuussinissamik isumaqatigiissuteqarluni (quliupput, aaqq.) sullissinerni angallassinermik ingerlatsisut, orsussap akiata qaffannerani akigitaminnik qaffaanissamut periarfissaqartitaapput, Air Greenland nalunaarpoq.
Sermitsiaq.gl-imut tuniniaanermi pisortaq Christian Keldsen oqarpoq uulia akitsoraangat isumaqatigiissut naapertorlugu akitsuutit ilaasunit akilerneqartartussaasut, Namm. Oqartussanit matuneqarsinnaanngimmat.
Danmarkimut timmisartornermi akit Air Greenlandip SAS-illu maajimi akitsorpaat, nunattalu iluani timmisartuussiviit allat qanittukkut akitsuiffigineqassasut Christian Kelsen oqarpoq, qanorli akitsortigissanersut oqaatigiumanagu.
- Massakkorpiaq naatsorsuivugut, oqarpoq.