Nukissiorfiit nunarsuarmi ilisimaneqalerpoq

Maajip naalernerani Nukissiorfinni sulisut marluk qaaqquneqarput ungasianiit nalunaarsorneqartartunik uuttuutilersuinermut tunngasunik saqqummiiartoqqullugit Barcelonami.

Peter Kjeldmann inuit ikittuinnaat akornanni saqqummiinissamut periarfissaqarsimavoq.

Ungasianiit nalunaarsuinermut tunngatillugu suliniummi sulisut marluk pisiniarnermut pisortaq Kent Skildal kiisalu ineriartortitsinermut siunnersortaasimasoq Peter Kjeldmann marluullutik peqataapput. Peter Kjeldmann aamma inuit ikittuinnaat akornanni saqqummiinissamut periarfissaqarsimavoq.

- Suliniut nalinginnaasumik eqqartorpara. Qanoq ililluta nunamut tamarmut teknikki taamaattoq atussallugu aalajangersimaneripput, sukkasuumik isumannaatsumillu, Peter Kjeldmann oqaluttuarpoq.

Nunarsuatsinni nukissiuuteqarfippassuit atuinermut uuttuutiminnik taarsersuileruttorput, imaluunniit taamaaliornissartik piareersarlugu. Sverigimi siuarsimanerpaapput, 2003-imi inatsisiliorsimagamik innuttaasut innaallagissamik atuisut tamarmik kingusinnerpaamik 1. juli 2009 atuinerminnut tunngatillugu qaammatikkaartumik nalunaarsorneqartassasut.

- Uagut suliniuterput immikkukajaaq inissisimavoq sumiiffimmi killeqartumi ingerlanneqarmat. Ataatsikkut uuttuutit nunamiittut tamaasa taarsersinnaavagut, Kent Skildal nassuiaavoq.

Barcelonamiinnertik pikkunaqisoq ataatsimeersuarnermi peqataasut marluk pitsageqaat.

- Piffissaq sivikitsuinnaq atorlugu paasivarput ajunngitsumut ingerlalluta. Iluaqaaq, Kent Skildal naggasiivoq.

Ataatsimeersuarneq sisamassaa ingerlanneqarpoq EU aaqqissuissuulluni. Ataatsimeersuarneq ulluni 28.-29. maj pivoq.

Ukioq kingulleq maajimi Sarfannguani innuttaasut nunatsinni siullersaallutik innaallagissamik imermillu atuinermut uuttuutinik ungasianiit nalunaarsortakkanik ikkussuivigineqarput. Atuisut uuttuutai ukiumut ataasiarlutik nalunaarsorneqartariarlutik maannakkut minutsit 15-kaarlugit nalunaarsorneqartalerput atuisullu atuinertik naapertorlugu akiliisarput siumoortumik á contomik akiliigallartarnatik, Nukissiorfiit nalunaarutigaa.

Powered by Labrador CMS