Tunumi Islandimilu aalisakkat ikileriarsimapput

Tunup Islandillu akornanni qalerallit aalisarneqarpallaalersimanerat malunnarsisimaqaaq, taamaammallu 2009-imi katillugit 5.000 tonsiinaat aalisarneqarnissaat biologinit siunnersuutigineqarpoq. 2007-imi pisat, islandimiut kalaallillu pisaat, 22.000 tonsiusimammata pisassiissutissatut siunnersuutigineqartut ikileriarujussuarput.

Tamatuma qaleralii Islandip nunattalu ataatsimoorussaraat, taamaammat biologinit kaammattuutigineqarpoq qalerallit ataatsimoorussat taakku qanoq aqunneqarnissaat pisassiissutillu qanoq agguataarneqarnissaat isumaqatigiissutigineqassasoq.

Ukiuni kingullerni pisaasartut pisassiissutigineqartartullu biologit siunnersuutaannit qaffasinnerusarsimaqaat.

Tunup Islandillu akornanni ammassaat aamma ikilisimaqaat taamaammallu biologinit kaammat-tuutigineqarpoq 2008-imi 2009-imilu aalisarfigineqassanngitsut.

Tamatuma ammassai ataatsimoorussaammata Kalaallit Nunaat, Island kiisalu Norge ammassaat taakku aqunneqarnerat pillugu isumaqatigiissusiorsimaput, pisassiissutit 11%-ii Kalaallit Nunaannoortuusut EU-mut tunineqartarput.

Ammassaat qallorneqartorujussuusarsimapput, 1993-2003-imi ukiumut 1 million ton-sit missaannik. Ammassaat biologinit ikilisimasutut nalilerneqarput ilaatigut aalisarneqarsimanerujussuat ilaatigullu Islandip eqqaani immap assut kissarnerulersimanera pissutigalugu.

Taamaammat 2009-imi pisat 8.800 tonsinut, imaluunniit 2007-imut sanilliullugit 1.600 tonsinik annikinnerusunngorlugit, ikilineqarnissaat biologit kaammattuutigaat.