Najaaraq Ittuk ikkarlummut attuuttoq
Qeqertarsuup Tunuani ilaasartaat ippassaq Qeqertarsuarmiit Aasiannut ingerlaarnermini Kitsissuarsuit kitaatungaanni ikkarlummut attuupoq, knr.gl allappoq.
Ikkarlinneq annikikkaluartoq ilaasut 20-t missaanniittut annilaarutigalugulu paasiuminaatsippaat ikkarlinnerup kingorna inuttamit ataatsimiilluunniit nassuiaasoqaranilu eqqissisaasoqanngimmat.
-Inuttanik takkuttoqanngilaq. Tamanna assut tupigaara, sumilluunniit oqaatsimik eqqissisaataasinnaasumik oqartoqanngimmat, Aasiaallu tungaanut ingerlaarnerput tamaat, tikikkattaluunniimmi nassuiaasoqanngilaq, ilaasut ilaat Bertha Schultz oqaluttuarpoq.
Ikkarlinnermi pisimasut pillugit Disko Linemi pisortaq Ole Dorph nassuiaavoq ippassaq Najaaraq Ittuup Kitsissuarsuit kitaatungaanni ikkarlinnera Søfartsstyrelsemut nalunaarutigisimagitsik, .ilaasartaallu Aasiannut tikimmat aqqartartunit misissorneqarsimasoq, singarninnguamilluunniit malunnartoqanngimmat umiarsuup angalaqqinnissaa akuersissutigineqarsimasoq.