Sulisut sinniisaat immikkut illersorneqalerput
Isumaqatigiissut nutaaq malillugu AG-mi sulisut sinniisaat sulisut sinniisaattut tunuarnermik kingorna ukiup affaani soraarsinneqannginnissaminnik qulakkeerinniffigineqarput.
Dansk Journalistforbundip Atugagdliutit/Grønlandspostenimik (AG) isumaqatigiissutini nutarteqqammerpaa. Pitsanngoriaatsit ilagaat sulisut sinniisorisimasaat siunissami kingumoortumik taaneqartumik illersorneqartalernerat. Tassa imaappoq, sulisut sinnissaat sinniisutut tunuarnerminnit, ukiup affaani soraarsinneqarnissaminut illersorneqarpoq, sulisut sinniisaatut sulisutulli.
Aalajangersaanermut tamatumunnga tunuliaqut piviusuulluinnarpoq. Sulisut sinniisorisimasaat Elna Egede siorna sulisut sinniisaattut tunuarnermi kinguninngua soraarsinneqarpoq. Tamatuma saniatigut aalajangersataq Danmarkimi aviisinik ullormut saqqummersartunik isumaqatigiissuterpassuarnit ilisimaneqarpoq, taamatut paasissutissiivoq DJ.
Tamatuma saniatigut isumaqatigiissutip nutarterneqarnerata kingunerisaanik aaqqissuisoqarfimmi sulisut akissarsiaat ukioq siulleq 5,4 %-it missaannik qaffariarput.
Qaffariaat tamanna sanilliunneqassaaq maannakkorpiaq Kalaallit Nunaanni aningaasat nalikilleriartupiloornerannut.
Isumaqatigiissutip atuuffiani ukiuni sinneruttuni marlunni tamani akissarsiatigut inissisimaffiit 500 koruuninik qaffanneqartassapput, tassa 1,8 %-p missaanik. Tamatuma saniatigut inuttut tapit qaffanneqarnissaanik isumaqatigiinniuteqarnissamut periarfissaqarpoq.