Nunaqarfimmiut paasissutissinneqarumapput
Nunaqarfimmiut sumi aatsitassarsiorfinni suliffissaqarnersoq paaserusuppaat.
Tamanna siunnersuisoqarfiup Center for Industriel Udviklingip Nuummiittup (CIU) namminersornerullutik oqartussat nalunarusiaanni marlunni takuneqarsinnaavoq.
Siunnersuisoqarfik misissuinerminut atatillugu Qeqertarsuup Tunuani Akunnaamiissimallunilu Saqqamiissimavoq aammalu Kullorsuarmiissimallunilu Upernaviup kommuniani Tasiusamiissimalluni. Nalunaarusiatigullu takuneqarsinaavoq inuit Kalaallit Nunaanni sumiiffinnut allanut suliartorusuttarsinnaanerpaat suliffeqareersuusut. Inuit qangatut piniartuunermik inuussutissarsiuteqartut misissuinermut peqataajumavallaarsimanngillat.
- Suliffissarsiortarusunnermut aamma qassinik ukioqarneq nunaqarfimmilu pissutsit aamma apeqqutaapput. Siunissami ingerlalluassangasoqartillugu sunngiffimmilu saariagassat pitsaatillugit nuukkusuttoqarnissaa ilimagivallaartariaqanngilaq, CIU-mik piginneqataasoq John Rosing oqarpoq.
Misissuinikkuttaaq erserpoq, aalajaatsumik akissarsiorfissaqarpat, pitsaasunik illussaqarpat, ilinniarnissamut periarfissaqarpat meeqqallu pitsaasumik atuarfissaqarpata aatsaat inuit allanut nuukkumasarnissaat ilimagineqarsinnaasoq.
John Rosingilli misissuiffigineqarsimasut ikippallaarmata misissuineq nunatsinnbut tamarmut tunngasutut isigineqarsinnaannginnerarpaa, ilaatigut suliffissaqarfiusinnaasunut nuuttarsinnaaneq eqqarsaatigalugu.