Angutit pingasut annaanneqartut

Nutaaq: Angutit pingasut Ilulissani tallimanngormat imaanut nakkarsimasut annaanneqarput.

Ilulissat eqqaanni imartaq iluliarpassualik kassorpassualillu sarfarsiataartut mianersorfissaalluinnarpoq.

Angutit pingaasut illoqarfiup kitaatungaani angallamminniit tammigussaasut aalisartup Katsi Gabrielsenip arnutaata nalaatsornerinnakkut takoriasaarpai.

- Umiatsiara sukkasuuliaq ingerlaannaq aallartipparput, minutsillu marluk qaangiuttut tikillutigit, Katsi Gabrielsen oqaluttuarpoq.

Angallammik ingerlatitsisoq kinaassutsiminik isertuusserusuttoq oqarpoq, 5-6 knobinik sukkassuseqarlutik ingerlatillutik umiatsiami issimasut tamarmik tassanngaannaq avammut tammigussaasimasut.

- Kisianni tamatta ilisimavugut nammineerlutalu umiatsimut ikinialersugullu umiatsiaq allap tikippaatigut, kalusiullutalu. Tamatuma kingorna umiatsiaaraq nammineq inississinnaasimavarput, umiatsiamik ingerlatsitsisoq oqarpoq.

Isiginnittut naapertorlugit umiatsiaq silaannarmut erfagiunneqariarluni ataasiarluni kaavissimavoq.

Umiatsiarmik ingerlatitsisup nammineq angallat sumut aporsimanersoq susoqarsimanersorluunniit nassuiarsinnaanngilaa.

- Kisianni ilulissamut apunngilagut, taanna qularnanngilaq, oqarpoq.

Ilulissani napparsimmaviup uppernarsarpaa, tallimanngornermi ajutoorneq pillugu saaffiginnittoqarsimasoq.

- Ajutoortut ilaat ataaseq kimillatsitersimasoq nakorsarneqarpoq, kisianni pisut kingorna annilaarsimagaluarlutik tarmik ajunngillat, napparsimmavimmi tusarfik oqarpoq.

Ilulissani politiit ajutoornermut atatillugu attavigineqarsimanngillat, taamaattumillu oqaaseqarsinnaanatik.

Powered by Labrador CMS