Qoororsuaq eqqissisitaavoq
Nutartugaq: Amerallip qinnguani nunarujussuaq qallunaatsiaqarfittalik aggustip aallaqqaataaniit allanngutsaaliugassatut eqqissisimatilaalissaaq.
Qoororsuup (Austmannadalen) tamatumalu eqqaata eqqissisimatitaanissaa pillugu malittarisassat nutaat Naalakkersuisut akuersissutigeqqammerpaat.
- Nunaminertap isikkuata allanngutsaaliorneqarnissaa aammalu sumiiffimmi aallaaniarsinnaaneq angalaarsinnaanerlu periarfissaqartillugu sumiiffiup innarlerneqannginnissaata qulakkeerneqarnissaa Naalakkersuisut eqqissisimatitassanngortitsinermi siunertaraat. Qoororsuaq eqqaatalu kulturikkut oqaluttuarisaanera nunallu isikkuata naleqassusia eqqarsaatigalugit Nuummut iluaqutaalluinnarsinnaavoq siunissamilu allanngutsaaliorneqartariaqarluni, attaveqarnermut avatangiisinullu naalakkersuisoqarfimmit oqaatigineqarpoq.
Naalakkersuisoqarfik naapertussagaanni nunami tamaani eqqaanilu eqqissisimatitami pinngortitaq asseqanngilluinnartuuvoq assigiinngisitaartumik isikkumigut pinngortitaassutsimigullu iluseqarluni, sorlu qooqqersimaneq (Qoororsuaq), qaqqat, tatsit, kuuit, qorlortoq, sermersuaq, narsaamaneq, naasuitsoq sioraqarfik aammalu nuna allanngorartuartoq.
Taakkua saniatigut nuna tamanna arlalinnik illukoqarfeqarpoq qanga qallunaatsiaat nunasisarsimanerannit aallaaveqartut, tamannami qallunaatsiaqarfimmi avannarlermi qallunaatsiaat najugaqarfigisimammassuk. Sumiiffillu tamanna aamma eskimuut piniariartarfiisa sinnikuinik peqarpoq.
Eqqissisimatitassanngortitsinissamik suliami Attaveqarnermut Avatangiisinullu Naalakkersuisoqarfik, Nuup kommunia aammalu Nunatta Katersugaasivia Allagaateqarfialu suleqatigiilluinnarsimapput, taannalu ilaatigut angallannermut, illuaqqanik sananermut aalaakkaasunillu allanik sanaartornermut taamatullu tupertorsinnaanermut malittarisassanik imaqarpoq.
Nalunaarut (bekendtgørelse) talerpiatungaani aasinnaavat.